Shymkent qalasynyń ákimi Murat Áıtenov sala mamandarymen birge megapolıstiń aldaǵy jylytý maýsymyna daıyndyq barysyn pysyqtady. Búginde qaladaǵy jylý júıesine qosylǵan 1945 kópqabatty úıdiń 93 paıyzy jylytý maýsymyna tolyq daıyn. Al, qalǵan úılerge jylýdy jetkizý júıelerinde jóndeý jumystary qarqyndy júrip jatyr. Osylaı degen qalalyq energetıka jáne ınfraqurylymdy damytý basqarmasynyń basshysy Boranbaı Bolatbekov bıýdjettik nysandar 98 paıyzǵa daıyn ekenin málimdedi.
«Qala aýmaǵynda 482 bıýdjettik nysan ornalasqan, búgingi tańda 474 nysan daıyndaldy. Iaǵnı, nysandardyń 98% aldaǵy jylytý maýsymyna daıyn. Atap aıtqanda 256 bilim nysany, 33 sport jáne 14 áleýmettik obektilerdiń barlyǵy daıyn. Al, densaýlyq saqtaýdaǵy 109 nysannyń búginde 103 daıyn, ol 94 paıyz, mádenıet salasynda 70 nysan bolsa, onyń 97 paıyzy daıyndalǵan»,-dedi basqarma basshysy. Bıyl qalada uzyndyǵy 29,5 shaqyrym bolatyn jylý júıelerine aǵymdaǵy jóndeý jumystary júrgizilýde. Onyń aıtýynsha, osy jyly jylý júıeleriniń tozý deńgeıin tómendetý maqsatynda jergilikti bıýdjetten 1,96 mlrd. teńge qaralǵan. Búgingi kúnge jumystardyń 84 paıyzy oryndalǵan, ol 24,7 shaqyrymdy quraıdy. Kestege sáıkes qyrkúıek aıynyń sońyna deıin tolyq aıaqtalady. Aıta keteıik, qalanyń jylý júıeleriniń uzyndyǵy 419,3 shaqyrymdy quraıdy. Bıýdjettik nysandardyń kómirge qajettiligi 4,7 myń tonna, tasymaldanǵany 4,6 myń tonna, suıyq otynǵa qajettiligi 980 tonna bolsa, tolyq qamtamasyz etilgen. Qajetti otyn kólemi 1 qyrkúıekke deıin jetkizilýi tıis.
Nazken
