Eşteŋenıŋ baiybyna barmai, anyǧyna jetpei, äleumettık jelıdegı sansyz aitaq sözderge erıp, azamattardy qaralau beleŋ alyp keledı. Feik aqparattyŋ taralu jyldamdyǧy aqiqaty basym, uaqyttyŋ şeşımın qajet etetın şynaiy mälımetterdı basyp ketıp jatyr. Mıne, eks-ministr Nūrlan Ermekbaevtyŋ Jambyldaǧy jarylystan keiıngı alǧaşqy portretı osyndai keleŋsızdıkterden qalyptasty. Ras, 17 azamattan beibıt künde aiyrylu oŋai emes, bıraq onyŋ sebep saldary tek bır kısıde emes ekenın bırazymyz bılemız.
Jarylys bolǧan sätten-aq otstavkaǧa ketuın talap etken qoǧamnyŋ ūsynysy jerde qalmady, ministr moinymen köterıp, jaǧdai tūraqtalǧan soŋ qyzmetımen qoş aitysuǧa daiyn ekenın mälımdedı. Bırer künnen soŋ Prezident eks-ministrdıŋ ötınışın qabyl alyp, ony būl qyzmetten bosatty.
Qoǧam qanaǧattanǧanmen, sarapşylar men saiasatkerler Ermekbaevtyŋ būl qadamyna taŋdana qarady. Sebebı būǧan deiın älemnıŋ özge elderınde oq-därı qoimalaryndaǧy jarylystan keiın eşbır ministr mansabyn toqtatpaǧan. Tıptı telegramdaǧy 300 myŋnan asa jazyluşysy bar NEZYGAR kanaly da Ermekbaevtyŋ äreketıne baǧa berıp, būryn soŋdy jarylysqa bola bır vedomstvonyŋ ministrı otstavkıge ketkenın estımegenın jazdy.
«Ras, özge elde, mäselen, Ukraina, Chehiia, Reseide jarylys boldy. Bıraq ministr emes, oq-därınıŋ saqtaluyna jauap beretın azamattardan sūrau alyndy. Jäne de mūndai keleŋsız oqiǧa ışkı tärtıp boiynşa tergelıp, jauaptylar jazasyn alatyn. Al Qazaqstanda būl basqalai örbıdı»,– dep jazyldy telegram kanalda.
Akkauntyŋ ökılderı Nūrlan Ermekbaevtyŋ būl äreketın alysty közdeu dep tūjyrymdady. Qiyn-qystau kezeŋde jauapkerşılıkten qaşpaitynyn körsetu arqyly bilıktıŋ senımınen şyǧa alatynynsezdırıp, tolyqtai moinymen kötere alatynyn däleldedı deidı.
Al belgılı qoǧam qairatkerı Ermūhamed Ertısbaev You Tube-tegı arnasynda Jambyldaǧy oqiǧaǧa baǧa berdı. Ol alyp-qaşpa äŋgımelerdı emes, qoljetımdı qūjattardy negızge ala otyryp, äskerdegı maman-ofiserlermen pıkırlesıp, tūjyrymyn aitty. Oq-därıler qoimasyndaǧy jarylys tabiǧi qūbylys bolmasa da, kezdeisoq närse emes, onyŋ äskerde oryn alu yqtimaldyǧy joǧary ekenın jetkızdı
– Älemdegı kez kelgen armiia üşın jarylys kezdeisoqtyq emes, ol ekonomikalyq deŋgeiıne de, geosaiasi ornalasuyna da, qandai da bır artyqşylyq pen kemşılıkke de bailanysty emes. Nege deseŋız, oq-därıler bolsyn, jalpy Qaruly Küşterdıŋ özı bolsyn, paradoksqa ūqsaitynyna qaramastan, joǧary qauıptıŋ közı bolyp tabylady. Qalai aitsaq ta, eşbır memlekettık organda qorǧanys vedomstvosynda siiaqty sonşa köp qauıptı, joiqyn qyrǧynǧa ūşyratatyn qaru-jaraq, tehnika men oq-därı joq. Qazaqstan armiiasynyŋ taǧy bır erekşelıgı – qaru-jaraq pen oq-därılerdıŋ basym bölıgı keŋes däuırınen qalǧan. Olardyŋ kepıldı paidalanu merzımı baiaǧyda ötıp ketken, – dedı qoǧam belsendısı.
Közı aşyq oqyrman Qazaqstan Qaruly Küşterındegı 30 jyl boiy jinaqtalǧan problemany otstavka şeşpeitının jaqsy tüsınedı.Ertısbaev ta mūny tarqatyp aitty.
– Armiia da bızdıŋ jalpy memlekettık jüie siiaqty öte «ikemsız», sondyqtan jyldar boiy qalyptasqandy tüzetu üşın Ermekbaev basşylyq etken 3 jyl ärine az. Elımızdıŋ tarihynda qorǧanys salasyn armiia generaldary da, saiasi basqaruşylar da basqarǧan bolatyn. Olardyŋ ärqaisysynyŋ kezınde de oq-därıler qoimalarynda jarylys bolyp, äskeri qyzmetşıler men azamattyq tūrǧyndar qaza tapqan. Ol tötenşe jaǧdailar bırlı-jarym da boldy jäne seriialy türde de boldy, bıraq eşbır ministr ornynan ketpedı, – dedı qoǧam belsendısı.
Almas JANTAIŪLY
