Aqberen Elgezek Aıagúldiń jumbaq ólimine qatysty aıyptaýlarǵa jaýap berdi

5641
Adyrna.kz Telegram

Qazaqstan jazýshylar odaǵy basqarma tóraǵasynyń birinshi orynbasary Aqberen Elgezek qalamger Aıagúl Mantaıdyń jumbaq ólimine qatysty Jazýshylar odaǵyna kiná taqqandarǵa jaýap berdi, dep habarlaıdy "Adyrna" ulttyq portalynyń tilshisi. Bul týraly aqyn óziniń Facebook paraqshasynda jazdy. 

BIRINShI AIYP: JAZÝShYLAR ODAǴY AIaGÚLDIŃ QAZASYNA KÓŃIL AITÝǴA JARAMADY!

- Jaýap: Aıagúl qaıtys bolǵanda Jazýshylar odaǵyna qarasty sol aptadaǵy «Qazaq ádebıeti» gazeti kóńil aıtý bergen. Odan bólek ózim quryp, júrgizip otyrǵan «Ult» portalynyń atynan da kóńil aıtý berildi. Meniń ótinishim boıynsha Jazýshylar odaǵynyń beldi qyzmetkeri Qaıyrnısa apaı Aıagúldiń sińlisine habarlasyp, bizden qandaı kómek dep suraǵanda, eshteńe qajet emes degen jaýap aldy. Biz qolymyzdan kelgenshe aqsha qurap (odaqtyń esebinen emes) týǵan-týysyna azǵantaı bolsa da kómek kórsetpek nıette edik. Alaıda, jaýap álgindeı boldy.

EKINShI AIYP: AIaGÚLGE JAZÝShYLAR ODAǴY KÓMEKTESPEDI, JUMYSQA ALMADY, ÁLEÝMETTIK JAǴDAIYNA BEI-JAI QARADY!

- Jaýap: Birinshiden, Aıagúl Jazýshylar odaǵyna, onyń Tóraǵasy Ulyqbek Esdáýlet aǵamyzǵa nemese maǵan tikeleı shyǵyp, «jaǵdaıym qıyn, maǵan kómektesińizder» dep ótinish jasamaǵan edi. Ekinshiden, Odaq músheleriniń ózine bizdiń uıym tikeleı materıaldyq-qarjylyq kómek bere almaıdy. Sebebi túsinikti shyǵar. Jazýshylar odaǵy óz kúshimen qalt-qult etip, jumys istep kele jatqan kóp úkimettik emes uıymdardyń biri ǵana. Tarıhı ataǵy zor bolǵanmen, qazirgi jaǵdaıy ondaı máz emes. Pandemııa kezinde tipti tıtyqtap qaldyq. Qanshama qyzmetkerimizdi aqysyz demalysqa jiberýge májbúr boldyq. Olardyń kóbi áli kúnge deıin jumyssyz úıinde otyr. QR Aqparat jáne qoǵamdyq damý mınıstrliginiń qoldaýynyń arqasynda ǵana gazet-jýrnaldarymyz («Qazaq ádebıeti» gazeti, «Juldyz» jáne «Prostor» jýrnaldary) úzdiksiz shyǵyp keledi. Sondyqtan, ár qalamgerge aqsha úlestirip ıa basqasha kómek berýge bázbireýler oılaǵandaı bizde ondaı qaýqar joq. Esesine, Almaty qalasynyń, Aqtóbe oblysynyń ákimdikterine shyǵyp, osynaý qıyn shaqta Jazýshylar odaǵynyń múshelerine ákim granttaryn berýge usynys jasaǵanbyz. Atalǵan ákimdikter kómektesti, qalǵandary áli qarastyrýda. Aldyn ala aıta keteıin: Aıagúl Jazýshylar odaǵynyń músheligine Túrkistan oblysynan qabyldanatyn jastardyń tiziminde turǵan. Alaıda, ári pandemııanyń kesirinen, ári Túrkistan oblysy ákimdiginiń jergilikti qalamgerlerdiń jıynyn ótkizemiz degen jaýabyn kútýmen ýaqyt ótip ketti. Biz áli de Túrkistan oblysynda (Nur-Sultanda, Taldyqorǵanda, Aqtóbede, Pavlodarda, Tarazda, Shymkentte, Óskemende, Qaraǵandyda ótken bolatyn) jańa múshelerdi qabyldaý rásimin ótkizý úshin óńir basshylyǵynyń jaýabyn kútip otyrmyz.

ÚShINShI AIYP: QAZAQSTAN JAZÝShYLAR ODAǴY AIaGÚLDIŃ TALANTYN BAIQAMADY!

- Jaýap: Aıagúl – talanty erte tanylǵan qalamger. Sonyń arqasynda kezinde Ulyqbek Esdáýlet aǵamyz ony «Qazaq ádebıetine» jumysqa alǵan bolatyn. Keıin Máskeýge oqýǵa baram dep Aıagúl ózi gazetimizden ketip qaldy. Ulyaǵań Aıagúldi ózi usynyp, «Serper» syılyǵyn (burynǵy áıgili Komsomol syılyǵynyń murager premııasy) alýyna daýys berip, járdemdesken edi. Odan bólek, Ulyqbek aǵa Aıagúlden ózge de ádebı-rýhanı qoldaý-kómegin aıaǵan emes. Máselen, Ulyqbek aǵa Aıagúldiń «Gaýhar» atty áńgimesin túrik tiline aýdartyp, Ankarada shyǵatuǵyn «Kardash kalamgerler» jýrnalyna túriktiń jazýshysy, osy basylymnyń redaktory, qazaqtyń úlken dosy Iakýb Omeroǵly myrzaǵa aıtyp júrip, jarııalap bergen. Oǵan marqum Aıash balasha qýanyp, rahmetin de aıtqan. Maǵan Ulyaǵańnyń ózi «osy Aıagúl jaqsy kóretin qaryndastarymnyń biri» dep talaı aıtqan bolatyn. Ulyqbek aǵanyń Aıagúlge jasaǵan qamqorlyǵyna rıza bolǵan qazaqtyń klassık jazýshysy Dýlat Isabektiń ózi qońyraý shalyp: «qaryndasyma jasap júrgen jaqsylyqtaryńa kóp rahmet» dep alǵys aıtqan kezderi de bolǵan. Buǵan Qudaı da, kózi tiri aǵalarymyz da kýá. Ulyqbek aǵa Aıagúldiń qazasyna barshamyz sııaqty qatty qaıǵyrdy. Sol kúnderi Aıagúldiń barlyq shyǵarmalaryn jınaqtap, bir kitap qyp shyǵarý kerek dep qazaqtyń aıaýly aqyny Qasymhan Begmanov aǵamyzǵa ótinish jasady. Ol kisi birden eleń etip, Aıagúldiń kitabyn «Dástúr» baspasynan shyǵaryp berýge ýáde berdi. Alaıda, marqumnyń qoljazbalary tergeýde jatqandyqtan, ol sharýa ázirge toqtap tur. Biraq, bolashaqta bul dúnıe iske asady dep senemiz. Jaǵdaıdyń osyndaı derekterin zerttep-bilmeı jatyp, «Aıagúldiń talantyn eshkim elegen joq! Aıagúlge eshkim kómektesken joq! Anadan sadaǵa ket, mynadan sadaǵa ket» dep aıtý durys pa, durys emes pe, ózińiz sheshińiz, aǵaıyn!

TÓRTINShI AIYP: AIaGÚLDIŃ JANAZASYNA, QYRQYNA JAZÝShYLAR ODAǴYNAN EShKIM BARǴAN JOQ!

- Jaýap: Birinshiden, biz barǵan kúnniń ózinde báribir marqumnyń janazasyna úlgermes edik. Onyń ústine, qazirgi karantın jaǵdaıynda óz densaýlyǵyn qaterge tigip barýdyń ózi qanshalyqty aqylǵa syıatyn is?! Eshkimge sen barasyń dep biz tapsyrma bere almaımyz. Qazir kez kelgen qazada óte shekteýli adam qatysatynyn bári biledi. Sondyqtan bul aıyp negizsiz dep bilemin. Aıagúldiń qyrqyna Túrkistan oblysy boıynsha fılıalymyzdyń dırektory Álibek Shegebaıǵa qatysshy dep ótinish aıtqan edik, ol Almatydamyn dep, óz kezeginde Shymkenttegi jazýshy aǵamyz Mombek Ábdákimulyna ótinish jasady. Mombek aǵamyz kelisim bergen edi, tańda jolǵa shyqqaly turǵanda aýyryp turǵanyn sezip, toqtaǵandy jón kóripti. Ol kisige esh renish joq. Jaǵdaıdyń túri mynaý. Basqa qalamgerge bizdiń ókilimiz retinde Aıagúldiń qyrqyna qatysyp, anasyna, týǵan-týysyna kóńil aıtyp baryńyz dep aıtýǵa múmkindigimiz bolmady,- dep jazdy Aqberen Elgezek.

Aqyn jeke basyna qatysty aıtylyp jatqan keı pikirlerge de toqtaldy. Aqberen Elgezek Aıagúl Mantaıdyń ózin aqyn retinde moıyndamaǵanyn rastady.

- Ol ras áńgime. Onda turǵan eshteńe joq. Árkimniń óziniń derbes ádebı-kórkem talǵamy bolady. Ádebıette “sen nasharsyń”, “men ulymyn” deıtuǵyn pikirtalastar bolyp turady. Ol qalypty nárse. Ondaı sózdi Aıagúldiń ózi de az estimegen bolar. Oǵan bola ol jazýyn tastap, ádebıetti tárk etip ketken joq qoı. Árkimniń óz oqyrmany bar. Unatqandar - oqıdy, unatpasa - kitabyńdy jaba salady. Problema joq!, - deıdi Aqberen Elgezek.

Eske salsaq, 29 shilde kúni jazýshy Aıagúl Mantaı Túrkistan oblysyna qarasty Jetisaıdaǵy týǵan úıinde qaıtys boldy. Jazýshynyń ólimine qatysty qazirgi tańda tergeý amaldary júrip jatyr. 

"Adyrna" ulttyq portaly

Pikirler