Taldyqorǵannyń oblys ortalyǵy mártebesin alǵanyna 20 jyl tolýyna oraı qaladaǵy ońtústik-batys turǵyn aýdanynyń "Bolashaq" shaǵyn aýdanynda kóppáterli úı paıdalanýǵa berildi.
Turǵyn úıdiń jalpy aýdany 5 myń sharshy metrden asady. Barlyǵy kópqabatty turǵyn úıde 55 páter bar.
Bas shahardyń mereıtoıy aıasynda 60-qa jýyq otbasy baspanaly bolyp otyr.Turǵyndardy merekemen quttyqtap, jańa páterdiń kiltin tabystaýǵa oblys ákimi Amandyq Batalov arnaıy keldi.
Ol óz sózinde, Taldyqorǵan qalasy oblys ortalyǵy bolyp aýysqaly beri tanymastaı bolyp ózgergendigin aıtty.
"Taldyqorǵanda sońǵy 20 jylda aımaqtaǵy barlyq salalar boıynsha ósý qarqyny oryn aldy. Qala jan-jaqty damydy. Jańadan shaǵyn aýdandar ashylyp, túrli áleýmettik nysandar boı kóterdi. Bunyń barlyǵyn jasaý úshin, qazynaǵa túsetin salyqtyń kólemi de artýy kerek. Qazirgi kezde bul kórsetkish 860 mlrd. teńgeni qurap otyr. Osynyń arqasynda búgingi deńgeıge jetip otyrmyz. Elbasy men Memleket basshysy Qasym-Jomart Kemelulynyń qoldaýy da qazirgi nátıjege qol jetkizýge múmkindik berip otyrǵanyn atap ótken jón",- dedi oblys ákimi Amandyq Batalov.
"Shańyraq"turǵyn úı baǵdarlamasynyń qatysýshylary jańa páterlerdiń baqytty ıegerleri atandy. Solardyń qatarynda, aq jaýlyqty ana Núken Qulbaıqyzyda bar.
"Balam búgin qutty shańyraǵynyń kiltin qolyna aldy. Bul qonys toıdy uzaq ýaqyt kúttik. 2005 jyly shańyraq kóterip, búginde 4 perzenti bar. Balalarym úshin óte qýanyshtymyn. Baspanalary berekeli bolsyn. Búgin tipti qýanǵannan kózime jas alyp otyrmyn",- deıdi Núken Qulbaıqyzy.
Aıta keteıik, aldaǵy 5-10 jylda qala taǵyda jańaryp, jandana túspek. Keleshekte bas shahar kórinisi búgingiden de ózgeshe bolmaq.
