Qazaqstan Kabulden 35 qandasty alyp şyqty. Qyrküiektıŋ basynda elge kelgen qandastar osy uaqytqa deiın karantinde otyrǧan olatyn. Memleket qandastarǧa tūratyn orynmen qamtamasyz ettı. Aldaǧy uaqytta olarǧa jūmys pen bır mezettık järdemaqy beru mäselesı de qarastyryluda. Qandastar Auǧanstanda qandai qiyndyqtar körgenın KTK telearnasyna bergen sūhbatta aitqan.
Faizulla Ahmadidıŋ otbasy qazırgı taŋda Burabai audanyndaǧy üş bölmelı üide tūryp jatyr. Qazaqstanǧa ol äielı men qaryndasyn jäne bes balasyn äkelgen. Olar soŋǧy tört jylda Qazaqstanǧa köşuge talpynǧan, alaida qūjattarymen qiyndyqtar bolypty.
Faizulla Ahmadi Auǧanstandaǧy qazaqtar jaily bylai deidı: "Bız Orta jüzdıŋ Qoŋyrat ruynanbyz. Bız Päkıstanda, İranda jūmys ıstegen edık, alaida keiın ol jaqta qiyndyqtar paida boldy. Auǧanstanǧa kelgenımızge köp bolmady. Keiın ony tälıbter basyp aldy. Bızge elşılık qyzmetkerlerı şyǧyp, Almatyǧa ūşyp ketu mümkındıgı tuyndaǧanyn aitty. Ol jaqta myŋǧa juyq qazaq qaldy, olar da Qazaqstanǧa kelgısı keledı. Olar ol jaqta tūruǧa qorqady, jūmys tabu da öte qiyn. Olarǧa "Öz otandaryŋa ketıŋder" deidı.
Qazır Auǧanstannan kelgen qazaqtar üşın basty mäsele jūmys tabu bolyp otyr. Memleket ol jaǧynan kömektesuge daiyn.
"Adyrna" ūlttyq portaly