Şymkent qalasynyŋ äkımı Mūrat Äitenovke biylǧy jyldyŋ alty aiynda atqarylǧan jūmystar turaly eseptı qalalyq energetika jäne infraqūrylymdy damytu basqarmasynyŋ basşysy B.Bolatbekov tapsyrdy. Basqarma basşysy bergen aqparatqa säikes, biylǧy jyly basqarma tarapynan 93 joba ıske asyryluda. Onyŋ ışınde auyz su boiynşa – 14, kärız jüiesı – 13, elektr energiiasy – 20, tabiǧi gazben qamtu – 18, jylu jüielerı – 3 jäne injenerlık infraqūrylym boiynşa – 25 nysannyŋ qūrylystary qolǧa alynǧan.
Biylǧy jyly auyz sudy kestemen tūtynuǧa mäjbür 5 tūrǧyn alap pen şaǧyn audandardyŋ ekeuınde auyz su jüielerınıŋ qūrylysy jürgızılse, su tasymaldap ışetın 7 eldı mekennıŋ tūrǧyndary ortalyqtandyrylǧan su jüielerımen qamtylmaq. Magistraldy jüieler boiynşa 3 nysannyŋ qūrylysy bastalǧan. Işkı oramdyq su jüielerınıŋ qūrylysy 11 şaǧyn audanda jürgızılıp otyr. Qūrsai şaǧyn audanyn qamtityn auyz su nysanynyŋ qūrylysy 2022 jyly aiaqtalmaq. Qala tūrǧyndaryn auyz sumen qamtu mäselesın jıtı qaraǧan qala äkımı Mūrat Äitenov magistraldy jüieler eŋ basty arna ekendıgın eske salyp, onyŋ qūrylystaryn ışkı oramdyq jüielerden būryn aiaqtau kerektıgın mındettedı.
İNFRAQŪRYLYMDYQ JÜIELERDI JAŊARTU KEZEK KÜTTERMEITIN MÄSELE
Basqarma basşysy bergen mälımetke säikes, tūrǧyndardy elektr quatymen qamtamasyz etu boiynşa biyl 18 joba qolǧa alynyp, ıske asyryluda. Onyŋ ışınde 15 tūrǧyn alap pen şaǧyn audanda elektr jüielerın jaŋartu jūmystary közdelıp, 3 qosalqy stansiianyŋ qūrylystaryn jürgızu josparlanǧan. Nätijesınde biyl 21 myŋnan astam adam tūtynatyn elektr quatynyŋ sapasy artady. Tabiǧi gazben qamtu boiynşa 7 jobanyŋ qūrylysy qarqyndy türde atqaryluda. Onyŋ ışınde 2 magistraldy jüieler men bes şaǧyn audandy gazben qamtu jūmystary atqarylyp otyr. Oǧan qosymşa 12 jobanyŋ qūrylysy 2022 jylǧa ötpelı.
ÄLEUMETTIK MAŊYZY BAR 700-DEN ASTAM KÖŞEGE JARYQŞAMDAR ORNATYLADY
Qala köşelerın abattandyru mäselesınde köşelerge elektr jaryǧyn ornatu josparlanǧan. Qazırgı taŋda qaladaǧy äleumettık maŋyzy bar 747 köşenıŋ 220 köşesıne ǧana jaryqşamdar ornatylǧan. Biyl 324 köşege jaryqşamdar ornatu, eskı jaryqşamdardy auystyru jūmystaryn atqaru közdelgen. Memlekettık-jekemenşık ärıptestık şeŋberınde 104 köşe boiynşa ıskerlık orta ökılderımen kelısımşarttar tüzılgen. Qazırgı taŋda būl jūmystar 31 köşede atqarylǧan.
AVT. ÄIGERIM
