Jańaózende munaıshylar taǵy da ereýilge shyqty. "ÓzenMunaıGazǵa" servıstik qyzmet kórsetetin "Kezbı" kompanııasynyń 500-ge jýyq jumysshysy keshe túnde jumysty toqtatty, dep habarlaıdy “Adyrna” ulttyq portaly “Informbıýro” jańalyqtar bólimine silteme jasap.
Kompanııanyń atqarýshy dırektory "ÓzenMunaıGazdan" alatyn tarıf az, sondyqtan qarajattan únemdeýge týra keledi dep aqtalady.
Osydan úsh aı buryn ereýilge shyǵyp, 11 talap qoıǵan "Kezbı" kompanııasynyń jumysshylary kesheden beri jumysty taǵy da toqtatty. Aıtýlarynsha, jazdaǵy ereýilden keıin qabyldanǵan sheshim tolyq oryndalmaǵan. Komıssııa sheshimi boıynsha jalaqy 50 paıyzǵa kóterilip, atqarylǵan jumys kólemine baılanysty 35 paıyzǵa deıin syıaqy berilý kerek bolǵan. 500-deı jumysshy qyrkúıek aıynda syıaqyny bergen joq deıdi.
Biraq jumysshylardyń narazylyqqa shyqqandaryna bir táýlik ótpeı jatyp, kompanııa búgin syıaqy taǵaıyndap, esepshottaryna aqsha aýdarypty. Alaıda jumysshylar ár aı saıyn syıaqymyzdy ereýilge shyǵyp talap ete almaımyz, turaqty túrde berilsin deıdi.
"Arbıtraj komıssııamen belgili bir sheshimge jetkenbiz. Endi osy aıda sol sheshim buzyldy. Bylaısha aıtqanda basshylar premııalnyı deıdi aqshamyzdy tolyqtaı tólegen joq. Qasym-Jomart Kemeluly Toqaev Mańǵystaý óńirine kelip birdeı jumys, birdeı jalaqy alý kerek dep aıtqan zańdy túrde. Al bizder qazir myna jerde turǵan jumysshylar basqa mekemelermen birdeı jumys jasaımyz. Biraq jalaqymyz olardan birneshe ese tómen deýge bolady", - deıdi jumysshy Qaırat Qosmaǵambetov.
”Adyrna” ulttyq portaly
