Ózbekstanda taýarlar týraly aqparatty tek memlekettik tilde berý mindettelmek

719

Ózbekstanda budan bylaı taýarlar (jumystar, qyzmetter) týraly aqparat memlekettik - ózbek tilinde berilý mindetteledi, dep habarlaıdy "Adyrna" ulttyq portaly.

Ózbekstan Zań shyǵarý palatasynyń depýtaty Rasýl Kósherbaevtyń aıtýynsha, bul bastamany «Tutynýshylardyń quqyqtaryn qorǵaý týraly» zańǵa ózgerister engizý arqyly maquldaý josparlanýda.

Depýtattyń aıtýynsha, zańda óndirýshi (oryndaýshy, satýshy) sonymen qatar tutynýshyǵa memlekettik tilde saýda men qyzmet kórsetý erejeleri týraly aqparat berýi tıis dep kórsetilgen.

Bul rette bul aqparatty ózbek tilinde de, basqa tilderde de berýge bolatyny aıtyldy.

«Meniń oıymsha, bul bizdiń ómirdegi memlekettik tildiń mańyzdylyǵyn arttyrýǵa baǵyttalǵan qadam bolady», - dep jazdy Kósherbaev óziniń Telegram -kanalynda.

Zań jobasyn Zań shyǵarý palatasynyń depýtattary qabyldady jáne maquldaý úshin Senatqa jiberildi.

Buǵan deıin 2 qazanda, Tashkent mańyndaǵy Shyrshyq qalasynda memlekettik tilde sóılesý mádenıetin nasıhattaý jáne basqa tilderden engen sózderdiń ornyna ózbek tilindegi balamalardy qoldanýǵa shaqyrý akııasy ótti. Bul áreket áleýmettik jelilerde orys tildi qoldanýshylardyń narazylyǵyn týdyrdy.

"Adyrna" ulttyq portaly

Pikirler
Uqsas jańalyqtar