Qorǵanys mınıstrligi qazir Jambyl oblysynyń Baızaq aýdanynda josparly túrde baqylanatyn jarylystar bolyp jatqanyn habarlady. Oq-dárilerdi taýǵa jetkizip, onda baqylanatyn jarylystar júrgiziledi.
Búgin 11.00, 12.00 jáne 16.00-de jarylystar uıymdastyrylady. Jospar boıynsha 12 qazan men 13 qarasha aralyǵynda jumys kúnderi saǵat 9.00-den 18.00-ge deıin áskerıler jarylǵysh zattardy joıýdy iske asyrady.
Qorǵanys mınıstrligi atalmysh másele boıynsha resmı habarlama jasady. "Oq-dáriler fragmentterin jarý boıynsha jumystar bastaldy. Budan buryn habarlanǵandaı, Qazaqstan Respýblıkasy Qorǵanys mınıstrligi ınjenerlik-saperlik bólimsheleriniń kúshimen Jambyl oblysynyń Baızaq aýdanynda oq-dáriler fragmentterin baqylap jarý bastaldy. Jumys kún saıyn dúısenbiden bastap juma aralyǵynda aǵymdaǵy jylǵy 13 qarashaǵa deıin júrgiziledi. Bul úshin adamdar joq taýly jerde áskerı bólim men eldi mekenderden alysta áskerı bólimnen 12 shaqyrymnan astam qashyqtyqta ýchaske belgilendi. Mamandar toby jergilikti halyq pen ınjenerlik-saperlik bólimsheler jeke quramynyń qaýipsizdigin qamtamasyz etý úshin tańdalǵan jer ýchaskesin tolyǵymen zerdeledi. Jergilikti atqarýshy organdary men jergilikti halyqqa jarý jumystarynyń júrgizilýi týraly aldan ala habarlandy. Jambyl oblysy Ishki ister departamentiniń qyzmetkerlerin tarta otyryp, áskerı polıııa kúshimen jarý ornynyń aınalasyndaǵy aýmaq qorshaldy. Jarý kezinde dybystyq áser bolady. Júrgiziletin jumystyń jergilikti halyq úshin qaýpi joq" dedi mınıstrlik.
"Adyrna" ulttyq portaly
