Aqyn, dissident Aron Atabektıŋ qyzy Aidana Aidarhan äkesımen kezdese almai jürgenın jetkızdı. Būl turaly ol äleumettık jelıdegı paraqşasynda jazdy, dep habarlaidy «Adyrna» tılşısı.
«Men ärqaşan sızdıŋ bostandyqqa şyqqan künıŋızdı elestetıp, oǧan senetınmın. Bıraq densaulyǧyŋyz naşarlap, qoldan jasalǧan jaŋa şyrmauǧa tüsesız dep oilamadym. Özıŋızdı mifologiia men ädebiettegıdei Serbers, Meduza Gorgon, dementorlar men nazgulalar qorşauǧa aldy. Sız bostandyqqa şyǧady degen künnen bastap özıŋız turaly jazylǧan bar aqparatty äleumettık jelılerden bılıp otyrmyz. Poliseiler äpkeŋız Räziia Nutuşevanyŋ üiıne aparǧannan keiın jaqyn aralyqta otbasyŋyzǧa, üige oralatynyŋyzǧa sengen edım. Alaida menıŋ tätem, mümkın bıreudıŋ qysymy bar şyǧar, būǧan jol bermei otyr. Auyr nauqas adamǧa kütım jasaǧany üşın köp rahmet. Räziia tätem senıŋ emdeluıŋe aqşa jinau jauapkerşılıgın de öz moinyna aldy»,– dedı ol.Aidana osy aralyqty äkesımen ekı-aq ret kezdesken.
«Sız «bostandyqqa» şyqqan 18 künnıŋ ışınde men sızdı ekı ret qana kördım. Būny köp adam bılmeidı. 15 jyldan soŋ qaita qauyşqan kezde men äkemdı kün saiyn köremın dep oiladym, tıptı jaqyn arada özımızben alyp ketemız dep ümıttendım. Bıraq sızdı jıbermei otyr, aldymen olar bızdı jai ǧana elemedı, endı «kovid» pen «karantindı» alǧa tartyp, telefonmen söilesuge rūqsat bermeude. Olar tıptı az ǧana uaqyt jüzdesuge, hattar men sälemdemeler jıberuge de tyiym saldy. "Bosatylǧannan" bırneşe kün ötken soŋ, sızdı şūǧyl türde kovid auruhanasyna apardy, bıraq Räziia tätem jäne onyŋ ainalasyndaǧylar koronavirus synaǧy terıs bolǧanyn habarlady. Būl jaŋalyq bızdı qatty quantty! Odan soŋ qaitadan tätemnıŋ üiıne apardy. Eskı emdelmeitın aurular qataryna pnevmoniianyŋ qosylǧanyn jariialady. Därıgerlerdıŋ "pnevmoniiadan", al qazır "kovidten" qalai emdep jatqandaryn, sızge qandai därı-därmekterdı taǧaiyndaǧanyn bılmeimız. Ekınşı kezdesuımız qysqa boldy. Men ūzaq jyldardan keiın özıŋızben oŋaşa qalyp tıldestım. Betpe-bet otyryp, ışkı syrlarym men qalai jaqsy köretınım turaly aittym. Sondai-aq üiımızge köşıp, bırge jūmys ısteudı ūsyndym. Sızdıŋ qoljazbalaryŋyz äldeqaşan terılıp qoiǧan. Men sızge kömektesıp, qorǧanyŋyz bolǧym keledı. Räziia tätege habarlastyq, öitkenı sızben tıkelei bailanys joq. Alaida ol naqty jauap bermei, äŋgımenı basqa arnaǧa būryp jıberdı. Osy demalys künderı men sızdı üige alyp ketuge tyrysyp, qasyma tuystarymdy, täuelsız jurnalisterdı jäne qoǧam qairatkerlerın ertıp özıŋızge bardym. Tätem maǧan qaqpany da aşpady, telefonmen söilesuge mümkındık bermedı jäne sızdıŋ «söilei almaitynyŋyzdy» jetkızdı. Qyzynyŋ äkesımen söilesuge qūqyǧy joq pa?» – dep jazdy Aidana Aidarhan.
«Adyrna» ūlttyq portaly
