Assambleıa yntymaq úlgisi bolýy kerek. Ásirese jastar arasynda birlikti nasıhattaý isinde osy uıym aldyńǵy qatardan tabylýy tıis. Osylaı degen Qazaqstan halqy Assambleıasy hatshylyǵynyń meńgerýshisi Marat Ázilhanov Shymkentke jasaǵan saparynyń maqsatyna toqtaldy. Qalalyq etnomádenı birlestikterdiń tóraǵalarymen jáne assambleıa janyndaǵy qoǵamdyq qurylymdardyń jetekshilerimen kezdesti.
Bıyl QHA qyzmet baǵyty boıynsha Shymkentte 186 is-shara uıymdastyrylǵan. Qoǵamdyq kelisim keńesterimen 19 másele qaraldy. Analar keńesteriniń bastamasymen 5 joba iske asty. Assambleıanyń medıatıvtik alańdarynda 53 daýly másele oń sheshilgen. Jıyndy júrgizgen qala ákiminiń birinshi orynbasary Shyńǵys Muqan shaharda atqarylyp jatqan sharýalarǵa toqtaldy.
Shyńǵys Muqan – Shymkent qalasy ákiminiń birinshi orynbasary
Qazaqstan halqy Assambleıasynyń HHIH sessııasynda berilgen tapsyrmalardy sapaly júzege asyrý barysy talqylanǵan jıynda etnomádenı birlestik ókilderine sóz berildi. QHA janyndaǵy Qoǵamdyq kelisim keńesiniń tóraǵasy Orynbaı Rahmanberdıev qalalyq fılıal qyzmetkerleriniń jalaqysyn kóterý kerektigin sóz etti. Koreı etnomádenı birlestiginiń tóraıymy Roza Pak, qalalyq ózbek etnomádenı birlestigi jastar qanatynyń múshesi Hýrmatoı Abdýhamıdova sóz sóılep, usynys-pikirlerin aıtty. Jıyndy túıindegen Marat Ázilhanov assambleıanyń álide atqarýy tıis sharýalardyń kóp ekendigin eskertti. Sonyń biri jastar arasynda yntymaqty damytý.
Marat Ázilhanov - QHA tóraǵasynyń orynbasary
Ózekti máseleniń biri elimizde jastar arasynda yntymaqty nyǵaıtý. Osy maqsatty assambleıa jumysyn jetildirý qajettiligi týyndaýda. Tárbıeni tal besikten bastaý kerektigin QR Aqparat jáne qoǵamdyq damý mınıstirligniń etnosaralyq qatynastardy damytý komıtetiniń tóraǵasy Ǵalym Shoıkın atap ótti.
Ǵalym Shoıkın - QR Aqparat jáne qoǵamdyq damý mınıstirliginiń etnosaralyq qatynastardy damytý komıtetiniń tóraǵasy
Assambleıa músheleriniń usynys-pikirlerin tyńdap, pikir almasqannan keıin QHA tóraǵasynyń orynbasary memlekettik saıasat aıasynda birlik pen tatýlyqty nyǵaıtýda belsendi qyzmet jasap júrgen birqatar azamattarǵa Alǵys hat tabystady.
K. Dúısenbi
