Ärtürlı tarihi, äleumettık, saiasi sebepterge bailanysty elımızde bırneşe ūlt ökılı qonystanyp, bırneşe ūlt basyn qosty. Bügıngı taŋda Qazaqstanda 130-dan astam ūlt pen ūlys ömır sürude. Osy ūlt ökılderı üşın qazaq jerı jerūiyqqa ainaldy. Qazaqstannyŋ köpūltty memleketke ainalyp, bır şaŋyraq astynda beibıt ömır süruı – elımızdıŋ basty jetıstıgı.
Dese de, elımızde ūltarazdyq tüsınıspeuşılıkter, etnosaralyq qaqtyǧystar oryn alyp jatady. Oǧan «Qordai qyrqysy», Penjımdegı oqiǧa dälel. Mūndai qaqtyǧystar elımızdıŋ tūtastylyǧy men bırlıgıne nūqsan keltıruı mümkın. Osy oqiǧalarǧa qatysty «Qazaqstannyŋ ūiǧyr jastary odaǧynyŋ» töraǧasy Rustam Kairyev bylai dep pıkır bıldırdı:
«Mūndai qaqtyǧystar tūrmystyq, äleumettık mäselelerden tuyndaidy. Bıraq elımızdegı ūlttardyŋ, etnostardyŋ bır-bırıne degen jekköru sezımı joq. Bır ūltqa belgılı bır qysym jasalyp jatqan joq. Äleumettık jelılerde ony uşyqtyryp, basqa jaǧynan körsetetınder köp. Alaida «jaman ūlt bolmaidy, jaman adam bolatynyn» ūmytpaiyq! Tatu-tättı ömır süreiık!».
Almaty qalasy Qoǧamdyq damu basqarmasynyŋ tapsyrysymen «Adyrna» ūlttyq-etnografiialyq bırlestıgınıŋ ūiymdastyryp jatqan “Bırlık - bereke bastauy” jobasy da eldı bırlıkke şaqyrady. Joba aiasynda özge etnos ökılderın qoldap, olardyŋ qazaq tılın meŋgeruıne jaǧdai jasaldy, türlı jarystar ötkızıldı. «Jaŋǧyru joly» öŋırlık ştabynyŋ müşesı Chepel Vladimirmen kezdesu ötıp, memlekettık tıldıŋ maŋyzdylyǧy talqylandy. Jastar toleranttylyq ūǧymymen tanys bolyp, Qazaqstan halqy Assambleiasy ökılderımen tanys boldy.
Mūndai şaralar tek bır joba kölemınde şektelmei, jalǧasyn tapsa igı. Öitkenı «Bırlıgı myqty el ozady» demekşı, halyq jäne etnosaralyq jaǧdaiymyz oŋdy bolǧanda, belesterdı baǧyndyramyz.
«Adyrna» ūlttyq portaly
