Bügın Belgradta (Serbiia) ötıp jatqan bokstan XXI älem chempionatynyŋ jartylai finalyna şyqqan bylǧary qolǧap şeberlerı anyqtaldy. Būl qatarda Qairat Satjanov bastaǧan ūlttyq qūramanyŋ bes boksşysy bar, dep habarlaidy «Adyrna» tılşısı Mädeniet jäne sport ministrlıgıne sılteme jasap.
Qazaqstandyqtar arasynan alǧaş bolyp şarşy alaŋǧa şyqqan Temırtas Jüsıpov (48 kg deiın) özbekstandyq Nodirjan Mirzaahmetovten bolǧan jekpe-jekte senımdı jeŋıske jettı. Älem chempionatyn 1/8 ainalymnan bastaǧan 2013 jyly Aziia chempiony bırınşı jekpe-jegınde serbiialyq Omer Ametovichtı jeŋgen.
Osydan keiın 54 kelıge deiıngı salmaqta synǧa tüsıp jatqan Mahmūd Sabyrhan braziliialyq Mişel Trinidadtan bır bas joǧary ekenın körsettı. 20 jastaǧy qazaqstandyq boksşy älem chempionatyndaǧy alǧaşqy jekpe-jegınde jastar arasyndaǧy älem chempiony oŋtüstık koreialyq İn Giu Kimdı, sosyn şotlandiialyq Mettiu Makheildı jeŋdı.
Al Qazaqstan qūramasynyŋ üşınşı ökılı Samatälı Töltaev (60 kg deiın) Rio Olimpiadasynyŋ kümıs jüldegerı, 2017 jylǧy älem chempiony fransiialyq Sofian Umiadan ailasyn asyra almady. Esterıŋızge sala keteiık, Samatälı Serbiiadaǧy alǧaşqy kezdesuınde tailandtyq, kelesı kezeŋde kolumbiialyq Duvan Zuletany qapy qaldyrǧan.
Qazaqstan enşısıne jartylai finaldyŋ üşınşı joldamasyn kapitan Abylaihan Jüsıpov alyp keldı. Ol moŋǧoliialyq Baatursuhiin Chinzoringpen bolǧan jekpe-jekte bar bılgenınen jaŋylǧan joq.
Kündızgı sessiiadaǧy soŋǧy bylǧary qolǧap şeberımız Nūrqanat Raiys (75 kg deiın) chempionatty osy jerden aiaqtauǧa mäjbür. Jerlesımızdıŋ jolyn italiialyq Salvatore Kavallaro kestı.
Tüngı sessiiada şarşy alaŋǧa şyqqan taǧy bes qazaqstandyq boksşynyŋ ekeuı ǧana bäsekenı ary qarai jalǧastyrady. Jazda Tokio Olimpiadasynda qola medal alǧan Säken Bibosynov täjıribelı kolumbiialyq, Riodaǧy olimpiia oiyndarynyŋ kümıs jüldegerı Iýbergen Martines Rivastan ailasyn asyrdy. Aita keteiık, osydan 2 jyl būryn Ekaterinburgte (Resei) ötken bokstan älem chempionatynda ekı boksşy ringte küş synasyp, Säkennıŋ mereiı üstem bolǧan.
Osy bır jeŋıstı seriiany 57 kelıge deiıngı salmaqtaǧy Serık Temırjanov jalǧap, jüldege ılıkken besınşı boksşy atandy. Pavlodarlyq sportşy reseilık Eduard Savinge eş mümkık qaldyrǧan joq.
Ökınışke qarai, osydan keiın jūdyryqtasqan qazaqstandyq üş şarşy alaŋ şeberı ūtylyp qaldy. Tartysty ötken jekpe-jekterde töreşıler Sanatälı Töltaevtı (63,5 kg) şotlandiialyq Riz Linchke, Aslanbek Şymbergenovtı (71 kg deiın) ukrainalyq Iýrii Zahareevke, Nūrbek Oralbaidy serbiialyq Vladimir Mironchikovke ese jıberdı dep eseptedı.
«Adyrna» ūlttyq portaly
