Bügın Aqparattyq-kommunikasiialyq ortalyǧynda Şymkent qalalyq Densaulyq saqtau basqarmasynyŋ basşysy B.Pozilovtyŋ qatysuymen brifing öttı.
Baspasöz mäjılısınde basqarma basşysy qaladaǧy epidemiologiialyq ahualdyŋ kürdelı ekenın aityp, tūrǧyndardy jalǧan aqparattardyŋ jetegınde ketpeuge şaqyrdy.
– Qazırgı taŋda Şymkent qalasy «qyzyl» aimaqta. Qaladaǧy epidahual tūraqsyz. Tūrǧyndarǧa aitarym: saqtanyp jürıŋızder. Kovid jūqtyryp, emhanaǧa tüsıp jatqan adam sany azaimai otyr. Därıgerdıŋ hattamasymen ǧana emdelıŋızder. Özdıgınen emdeludıŋ saldarynan nauqastyŋ köbısı emhanaǧa auyr halde jetkızılıp jatyr. Sol sebeptı asqynǧan aurudy emdeu nätijesın bermeude. Al jalǧan aqparattarǧa aldanyp, antivakserlerge senbeŋızder. Osy oraida, ekpe jaily qarsy pıkır (antivakserler) bıldıruşılerdı erıktı bolyp, män-jaidyŋ barysyn bırge baqylap köruge şaqyramyn. Būl rette därıgerler kündız-tünı janyn salyp dertpen küresude. Qūrmettı qala tūrǧyndary, vaksina qabyldaŋyzdar. Aurudyŋ aldyn aluǧa bärımız bır kısıdei atsalysaiyq! – dedı Baqytjan Joldasbekūly.
Spikerdıŋ sözınşe, qazırgı taŋda üşınşı megapoliste 7 397 nauqas emdelıp jatyr. Onyŋ ışınde 4 809 nauqas üi jaǧdaiynda ambulatorlyq, 2 588 nauqas stasionarda em qabyldauda. Al ötken täulıkte COVID-19 infeksiiasyn jūqtyrudyŋ 535 jaǧdaiy tırkelgen.
Sonymen qatar, ekpe alu boiynşa Şymkent şahary elımız boiynşa 1-orynda tūr. Bügıngı tiıstı kontingenttıŋ (536 000 adam) 1-komponentı 70,2%, 2-komponentı 54 paiyz vaksinasiialanǧan.
Aita keteiık, qala äkımdıgı janynan aşylǧan «call-center» täulık boiy jūmys jasauda. Al qaladaǧy biznes subektılerı üşın «Ashyq» jobasy ıske qosylǧan.
Şymkent qalasynyŋ Aqparattyq-kommunikasiialyq ortalyǧy
Foto – Serık Qosaev
