Özbekstandyq kino maitalmandary bolaşaqta Qazaqstan turaly bırneşe baǧytta tyŋ tuyndylar tüsırmek. Būl turaly «Özbekkino» ūlttyq agenttıgınıŋ basşylyǧy elşımen kezdesu barynda mälımdedı.
Basqosuda ekı el arasyndaǧy mädeni bailanysty odan ärı nyǧaitu maqsatynda arnaiy jol kartasyn jasau jaiy da söz boldy. Onda kino salasyndaǧy bailanystyŋ negızgı baǧyttary men maqsattary körsetıledı. Jobany jüzege asyru üşın ssenarister men kino rejisserler jäne operatorlardan jasaqtalǧan bırlesken şyǧarmaşylyq top qūru jaiy da aityldy. Körşıler qazırdıŋ özınde ūlttyq batyrlary Jalaleddin Manguberdi jaily tüsırıp jatqan kinosynyŋ basym bölıgın Qazaq jerınde tüsırudı josparlap otyr eken. Tuyndy arqyly bauyrlas elderdıŋ tarihy men mädenietınıŋ bır ekenın körsetemız,- deidı rejisserlar.
- Şyn mänınde bız Qazaqstandyq dostarymyzben bırge kino salasynda köp närse atqaruymyz qerek. Öitkenı qazaq halqymen tamyrlas, tūtas dıŋgek bolyp bırıgıp, bailanysyp jatyrmyz deuge bolady. Bızdıŋ tılımız de, dınımız de, salt-dästürımız de dünietanymymyz da bır-bırıne jaqyn. Sondyqtan bız qazırden bastap bolaşaqqa baǧdar jasauymyz qajet, - dedı Şuhrat Rizaev, «Özbekkino» ūlttyq agenttıgı bas direktorynyŋ bırınşı orynbasary.
Biyl Özbekstannyŋ Qazaqstandaǧy jyly aiasynda bızdıŋ elde özbek kinosynyŋ künderı ūiymdastyrylady.
24.kz
