Qala äkımı Güljan Qūrmanbekova azamattardy jeke ötınışterı boiynşa qabyldau kezınde jeke käsıpker Ainūr Bektemırqyzy men Müslima Raqymjanova toihanany mektepke ainaldyru turaly ūsynys aitty.
Äkımnıŋ apta saiynǧy dästürlı qabyldauyna būl joly 20 tūrǧyn kelgen bolatyn. Olardyŋ arasynda tūrǧyn üi mäselesı men jūmyspen qamtylu jaiy, jyljymaityn mülıktı zaŋdastyru boiynşa aryz, şaǧymdar da aityldy. Erekşelıgı sol arystyq qos käsıpker özderınıŋ ielıgındegı toihanany jauyp, 7 jyldyq mektep aşuǧa äkımnıŋ tıkelei yqpal etuın sūrai kelgen.
Qala äkımıne serıktesınıŋ de būiymtaiyn jetkızgen Ainūr Bektemırqyzy bılım ordasyn aşuǧa tolyq mümkındıgı bar bolǧanymen, qūjattamalyq räsımdeu tūrǧysynan äkımdıktıŋ kömegı qajettıgın alǧa tartty.
«Būl özı Memleket basşysy Qasym-Jomart Kemelūlynyŋ keşe ǧana jariia etken Joldauynda aitylǧan tapsyrmamen tıkelei ūştasady. Öte qūptarlyq ūsynys. Sondyqtan qalalyq jer qatynastary bölımı men säulet-qūrylys bölımınıŋ basşylaryna şūǧyl tapsyrma beremın. Olar osy mäselenı şeşudıŋ zaŋdy jolyn qarastyrsyn», – dedı Güljan Mamytqyzy.Jeke qabyldau kezınde taǧy bır qala tūrǧyny Säule Bekzatova jeke mäselesınen būryn köptıŋ kökeiınde jürgen özektı mäselenı köterdı. Bes balanyŋ anasy Arys qalasyn internetpen qamtu üderısıne köŋılı tolmaityndyǧyn jetkızdı. Aiyna 20 myŋ teŋgege juyq aqy tölese de, internettı tiımdı paidalana almai otyrǧan ol tūtynuşy retınde qūqy şektelıp jatqandyǧyn aitty. Būl mäselege qatysty qala äkımı aqparattyq qauıpsızdık jäne memlekettık körsetıletın qyzmetter monitoringı bölımınıŋ basşysy Almas Sūltanovqa şūǧyl tapsyrma berıp, tiıstı vedomstolarmen keŋese otyryp problemany şeşudı jüktedı.
"Adyrna" ūlttyq portaly
