Şymkenttık zeinetker Türkıstan qalasyna ekologiialyq taza kölıkpen jetpek. 81 jastaǧy Keŋesbek Seidınbekūly būl saparyn el Täuelsızdıgınıŋ 30 jyldyǧyna arnap otyr. Belsendı aqsaqaldy perzentterı, nemere-şöberelerı men qalalyq sport basqarmasynyŋ ökılderı, jastar şyǧaryp saldy.
Zeinetker Türkıstan qalasyna Temırlan, Qyzyl köpır, Şäuıldır eldımekenderı arqyly jetudı josparlaǧan. Jolai Qajymūqan kesenesıne soǧyp, jergılıktı tūrǧyndarmen jüzdespek. Osylaişa 220 şaqyrym joldy velosipedpen basyp ötıp, Türkıstan qalasyna senbı künı jetudı közdep otyr.
– Velosiped teuıp kele jatqanyma 70 jyldan asty. 10 jasymda äkemnıŋ ınısı Jolymbek velosiped syilap, aq batasyn bergen edı. Sodan berı salauatty ömır saltyn ūstanamyn. Jastar da belsendı bolsa eken deimın. Al basty tılegım – Şymkent siiaqty ırı qalalardyŋ halqy jergılıktı basşylardyŋ bastamasymen är jeksenbını velosipedke arnap, būqaralyq sportpen ainalyssa, – deidı Keŋesbek aqsaqal.
Jihankez eŋ alǧaşqy alys saparyna 2001 jyly şyqqan. Türkıstannyŋ 1500 jyldyǧyna orai Özbekstan, Türkmenstan, İran, İrak, Kuveit arqyly Mekke-Mädinaǧa 63 künde jetken. 2003 jyly Qazaqstan-Resei jylyna orailastyryp Şymkentten Mäskeuge barsa, 2016 jyly Qazaqstan täuelsızdıgınıŋ 25 jyldyǧy qarsaŋynda Şymkentten Auǧanstan astanasy Kabulǧa ekı döŋgelektı kölıgımen jetken eken. Al 2017 jyly «EKSPO» qūrmetıne Şymkent–Astana baǧytyn baǧyndyrǧan.
N.BEKTAEV FOTO Serık Qosaev
