Äl-Farabi audanynda adam köp şoǧyrlanǧan 15 orynǧa qala tūrǧyndary men qonaqtary tegın su ışuı üşın auyzsu būrqaqtaryn (pitevoi fontan) ornatu josparlanyp otyr. Atalǧan joba audan demeuşılerı esebınen ırı sauda ortalyqtary men saiabaqtarǧa qoiylmaq. Bügınde subūrqaqtardyŋ eskizı daiyndalyp, demeuşılermen kelıssözder jürgızılıp jatyr.
Būl jönınde audan äkımı Raşid Myŋbaev @akimat_shymkent paraqşasynda tūrǧyndarmen tıkelei efirde jüzdesu barysynda aitty.
Sondai-aq, audan basşysy taǧy bır jaŋa bastamanyŋ qolǧa alynyp jatqanyn jetkızdı. Audan aumaǧyna jolauşylardyŋ haby sanalatyn 10 nüktege soŋǧy ülgıdegı «Smart» aialdamalar salynbaq. Onda tūrǧyndardyŋ yŋǧailylyǧy üşın tegın Wifi, smartfon quattaǧyş közderı, kondisioner, qalanyŋ kartasy jäne marşrut baǧyttary körsetılgen elektrondy taqtaişa ornatylady.
Audannyŋ äleumettık jaǧdaiyn jaqsartuǧa niettı azamattardy tyŋ ideialar men jaŋa bastamalardy bırge jüzege asyruǧa şaqyrdy. Efir soŋynda tūrǧyndardan kelıp tüsken sūraqtarǧa jauap berdı.
"Adyrna" ūlttyq portaly
