Aqtóbe oblysynda «Tuǵyrly Táýelsizdik» atty respýblıkalyq aqyndar aıtysy ótti

2515
Adyrna.kz Telegram

15-16 qarasha kúnderi Aqtóbede el Táýelsizdiginiń 30 jyldyǵyna arnalǵan jáne "Rýhanı jańǵyrý" baǵdarlamasyn júzege asyrý maqsatynda oblys ákimdiginiń qoldaýymen oblystyq mádenıet, arhıvter jáne qujattama basqarmasy men oblystyq halyq shyǵarmashylyǵy ortalyǵynyń uıymdastyrýymen Stýdentter saraıynda «Tuǵyrly Táýelsizdik» atty respýblıkalyq aqyndar aıtysy ótti.

Maqsat — ata-baba armandaǵan táýelsizdik halyqqa ne berdi,  jetistikterimiz qandaı,  qaı tusta qapy qalyp júrmiz degen tóńirekte kópshilikke oı tastaý,  ulttyq ónerdi, qazaqtyń aıtys dástúrin jalǵastyryp júrgen aqyndardy jurtshylyqpen taǵy bir qaýyshtyrý.

15 qarasha kúni Aqtóbe oblysynyń ákimi Ońdasyn Orazalın​ Qazaqstan Respýblıkasy Táýelsizdiginiń 30 jyldyǵyna​ arnalǵan​ «Tuǵyrly Táýelsizdik» atty respýblıkalyq aqyndar aıtysynyń qazylarymen jáne qonaqtarymen kezdesti. Kezdesýge halyq ártisi Asanáli Áshimov pen onyń jubaıy Baǵdat Áshimova,​ aıtys aqyndary men jyrshy-termeshilerdiń halyqaralyq odaǵynyń tóraǵasy​ Júrsin Erman,​ Qazaqstannyń​ eńbek sińirgen qaıratkerleri​ ​ ​ Amanjol Áltaı,​ Ǵalym Jaılybaı men​ Daýletkereı Kápuly,​ aqyn-ımprovızator Baýyrjan Halıolla​ qatysty.​Kezdesý barysynda mádenıetke, aıtysty ulttyq óner túri retinde damytý jáne dáripteý suraqtary​ talqylandy.​

Aqyndar aıtysyna Qazaqstannyń Eńbek Eri Asanáli Áshimov bastaǵan qazylar alqasy tórelik etti. Sóz saıysyn Qazaqstannyń eńbek sińirgen qaıratkeri,  aıtys aqyndary men jyrshy-termeshilerdiń halyqaralyq odaǵynyń tóraǵasy,  belgili aqyn Júrsin Erman júrgizdi. Quttyqtaý sózimen Aqtóbe oblysy ákiminiń orynbasary Bulbul Eleýsinova ashyp, sáttilik tiledi.

Jyr jármeńkesine Nur-Sultan, Almaty, Shymkent qalalarynan, Batys Qazaqstan, Jambyl, Qostanaı, Túrkistan, Pavlodar, Shyǵys Qazaqstan, Atyraý, Aqtóbe oblystarynan 20 sýyryp salma ónerdiń ókilderi kelip, kórermenderdi áýezdi áýen, utymdy uıqasqa bóledi.

Sóz saıysynyń nátıjesinde bas júlde aqtóbelik aqyn Marat Ahmetovke buıyryp, ol 2 mln teńge aqshalaı syıaqyny qanjyǵasyna baılady. Birinshi oryndy almatylyq Rústem Qaıyrtaı (1,5 mln teńge), ekinshi oryndy aqtóbelik Arýna Kerimbek (1 mln teńge) pen batysqazaqstandyq Baýyrjan Shırmedınuly ıelendi. Al úshinshi oryndy jambyldyq Qanat Myrzahanuly, túrkistandyq Dáýren Aqsaqalov, aqtóbelik Juldyz Qojabekova, pavlodarlyq Raýan Qaıdarov bólisti.

Olardyń árqaısysyna 500 myń teńgeniń sertıfıkaty tapsyryldy. Almatylyq Nurlan Esenqul jáne shyǵyzqazaqstandyq Serik Qýanǵanǵa 450 myń teńgeniń arnaıy syılyǵy tabystaldy. Sondaı-aq barlyq aqyndar dıplomdarmen marapattalyp, 300 myń teńgege ıe boldy.

 

 

«Adyrna» ulttyq portaly.

Pikirler