Jambyl atyndaǧy filarmoniia ūjymy köpşılıktı önerımen täntı ettı

Qazaqstan Respublikasy Täuelsızdıgınıŋ 30 jyldyǧy jäne Jambyl Jabaevtyŋ 175 jyldyǧyna orai Şymkent qalalyq äkımdıgınıŋ qoldauymen "Türkıstan saraiynda" Jambyl atyndaǧy Qazaq memlekettık filarmoniiasy QR memlekettık akademiialyq simfoniialyq orkestrı jäne «TURAN» folklorly-etnografiialyq tobymen bırge «FOLK & SYMPHONY» atty konserttık baǧdarlamasyn ūsyndy. Jambyl atyndaǧy filarmoniianyŋ körkemdık jetekşısı Qazaqstannyŋ eŋbek sıŋırgen qairatkerı Amantai Berǧalievtıŋ aituynşa, Qazaqstan Respublikasynyŋ Memlekettık akademiialyq simfoniialyq orkestrı 1958 jyly Jambyl atyndaǧy Qazaq memlekettık filarmoniiasynyŋ qūramyna engızılgen. -Ūzaq jylǧy şyǧarmaşylyq jolynda ūjymdy köptegen ataqty muzykanttar basqardy. Qazır orkestrge talantty jas dirijer Qanat Omarov jetekşılık etedı. Qazaq kompozitorlarynyŋ jaŋa tuyndylaryn nasihattauda simfoniialyq orkestrdıŋ rölı zor, jäne olarmen şyǧarmaşylyq dostyǧy būrynnan kele jatqan dästürlerge ie. Al "Türkıstan saraiynda" qoiylǧan konsert būl qazaq än önerındegı folklorlyq tuyndylar men simfoniialyq orkestr şyǧarmalarynyŋ özara sintezı, - dedı ol. «TURAN»folklorly-etnografiialyq ansamblı 2008 jyly Qūrmanǧazy atyndaǧy Qazaq ūlttyq konservatoriiasynyŋ qabyrǧasynda qūrylǧan. «Tūran» – qazaq halqynyŋ köneden kele jatqan töl muzykalyq önerın qazırgı zaman ūrpaǧynyŋ talǧam-tanym tarazysymen qaita jaŋǧyrtudy maqsat tūtqan ūlttyq etno-folklorlyq top. Top – ūlttyq köne aspaptardyŋ ünın qaita tırıltudı, jaŋa ündestık pen ädıs-täsılderdı tauyp qoldanysqa engızudı közdeidı. Otyzdan astam qazaq halqynyŋ ūlttyq aspaptary bolsa, muzykanttardyŋ ärqaisysy solardyŋ bırneşeuınde oinaudy meŋgergen. Solardyŋ ışınde, sybyzǧy, sazsyrnai, dombyra, üş ışektı dombyra, jetıgen, bas jetıgen, qylqobyz, narqobyz, şaŋqobyz, şerter, şıŋkıldek, ūrmaly, şuly-syldyrly aspaptar, sonymen qatar türkı älemıne ortaq kömeimen qailau än aitu önerı jäne taǧy basqalar bar. Sondai-aq baǧdarlamada qazaq kompozitorlary men ansambldıŋ avtorlyq şyǧarmalary oryndaldy.