Täuelsızdıkke 30 jyl: Türkiiada qūryltai öttı

Qazaqstan Respublikasy Täuelsızdıgınıŋ 30 jyldyǧy aiasynda Ystanbūl qalasynda Düniejüzı qazaqtary qauymdastyǧynyŋ «Jahandanu örkenietındegı qazaq älemı» atty kışı qūryltaiy öttı.

Alystaǧy aǧaiynnyŋ alqaly mäjılısı bastalmas būryn jergılıktı bilık ökılderı men kışı qūryltai delegattary jäne qala tūrǧyndary türık pen qazaqqa ortaq tūlǧa Mūstafa Öztürık atyndaǧy saiabaqtyŋ aşylu saltanatyna qatysty. Saiabaq Qazaqstannyŋ Türkiiadaǧy Elşılıgı men Ystanbūldaǧy Bas konsuldyǧynyŋ ūiytqy boluymen jasalǧan. Aşyluda Ystanbūl qalasynyŋ 800 myŋ halqy bar Baǧjylar audanynyŋ äkımı Lokman Chaǧyryjy, Qazaqstan Respublikasynyŋ Ystanbūldaǧy Bas konsuly Älım Baiel, Düniejüzı qazaqtarynyŋ qauymdastyǧy Töraǧasynyŋ bırınşı orynbasary Zauytbek Tūrysbekov söz söilep, daŋqty sportşynyŋ eskertkışı ornatylǧan saiabaqtyŋ lentasyn qidy. Is-şaraǧa M. Öztürıktıŋ qaryndasy Perihan men Germaniiada tūratyn qyzy Neslihan da qatysty.