Şymkent: Jastar kelelı keŋeste bas qosty

Üşınşı megapoliste jastar jalpy halyqtyŋ 21,7% paiyzyn nemese 239 986-adamdy qūraidy. Qalada 8 joǧary jäne 38 arnauly oqu oryndary bar. Būl bılım ordalarynda 125 390 student bılım aluda. 2021 jyly qala äkımınıŋ bastamasymen 4 audanda Jastarǧa qyzmet körsetu ortalyqtary aşyldy. Būl turaly täuelsızdıktıŋ 30 jyldyǧyna orai körme ortalyǧynda ötken qala äkımdıgınıŋ janyndaǧy jastar saiasaty jönındegı keŋeste aityldy. «Jastar qoǧamnyŋ qozǧauşy küşı» atty keŋes aşyq äŋgıme formatynda öttı. Oǧan qalalyq jastar resurstyq ortalyǧy mūryndyq boldy. Keŋeste megapolis jastar saiasatyn qalyptastyruda, jūmyssyzdyqtyŋ aldyn aluda atqarylyp jatqan jūmystar söz boldy. «Jastar - Otanǧa» jol kartasy indikatorlarynyŋ oryndalu barysy qorytyndylanyp, aldaǧy atqarylatyn jūmystary saralandy. Kezdesu barysynda öŋırımızde jas käsıpkerlerge arnalǧan jobalar, mausymdyq jūmystar men jastar ortalyqtarynyŋ jūmysy qozǧaldy. Qala äkımınıŋ bırınşı orynbasary Şyŋǧys Mūqannyŋ töraǧalyǧymen ötken keŋeske «Nur Otan» partiiasy qalalyq filialy töraǧasynyŋ bırınşı orynbasary Janar Bektaeva, taekvondoşy, Qazaqstan Respublikasynyŋ chempiony, London Olimpiadasynyŋ qatysuşysy, Aziia oiyndarynyŋ jeŋımpazy Feruza Ergeşova, QR Aqparat jäne qoǧamdyq damu ministrlıgı «Jastar» ǧylymi zertteu ortalyǧynyŋ direktory Aian Sakoşev pen mäslihat deputattary, audan äkımderı, qūqyq qorǧau, aumaqtyq departament basşylary, qala äkımdıgınıŋ basqarma basşylary, türlı salada jūmys jasaityn jas mamandar, joǧarǧy oqu orynnyŋ basşylary, joǧary jäne orta arnauly oqu oryndarynyŋ studentterı men 400-ge juyq belsendı jas qatysty. Jiynda söz alǧan Şyŋǧys Jūmabekūly şaharda memlekettık jastar saiasatyn jüzege asyrylu barysyna toqtaldy. – Barşaŋyzǧa belgılı biyl elımızde egemendıktıŋ 30 jyldyǧy atalyp ötıp jatyr. Şymkentte ärbır ekınşı adam nemese halyqtyŋ 52 paiyzy täuelsızdıktıŋ töl tumalary. Ortaşa jas – 26. Şymşahar – elımızdegı jastardyŋ qalasy. Megapolistıŋ bolaşaǧy jarqyn, jastardyŋ mümkındıkterı mol. Bügıngı jastarǧa eŋ bırınşı bılım kerek. Būl rette qalamyzda 782 bılım beru ūiymy bar. Käsıpkerlık salasynda jäne jastardy jūmyspen, baspanamen qamtamasyz etude de jüielı jūmystar atqarylyp keledı. Elımızdıŋ damuynda jastardyŋ alatyn orny öte erekşe. Memleket basşysy aitqandai, «Täuelsızdık ruhymen ösıp kele jatqan bügıngı jas buyn – bızdıŋ erteŋgı ümıtımız, senımdı tıregımız», - dedı Şyŋǧys Mūqan. Jiyn barysynda qaladaǧy jūmyspen qamtu, käsıpkerlık, tūrǧyn üi salalary boiynşa atqarylyp jatqan jūmystar arnaiy beinerolik arqyly tanystyryldy. Memlekettık baǧdarlamalardyŋ şarapatyn körgen jastar jaryssözge şyǧyp öz täjıribelerımen bölıstı.