Şymkent qalasynda «Alǧaşqy jūmys orny» jobasy jüzege asyrylyp jatyr

Şymkent qalasynda «Eŋbek» memlekettık baǧdarlamasy aiasynda jastardy jūmyspen qamtu ıs-şaralary belsendı jürgızılude. Memlekettık baǧdarlama şeŋberınde eŋbek täjıribesı joq jastardy qoldau maqsatynda «Alǧaşqy jūmys orny» jobasy jüzege asyrylyp jatyr. Baǧdarlamaǧa qatysuşylardyŋ bırı – Merei Atymtai. Ol biyl «Şymkent joǧary medisinalyq» kolledjın «Dantist-stomatolog» mamandyǧy boiynşa tämamdaǧan bolatyn. – Oqu ornyn bıtırgen soŋ bırden jūmys tabyla qoimady. Barlyq jerde jūmys täjıribesın talap etedı. Bıraq mende olarǧa qajet täjıribe bolǧan joq. Diplomdy endı alǧan kezım ǧoi. Keiınen jastarǧa arnalǧan jaŋa joba bar ekenın estıp, qalalyq jūmyspen qamtu ortalyǧyna baryp, keŋes aldym. Onda maǧan baǧdarlamanyŋ şarttary men tiımdılıgın tüsındırıp, öz mamandyǧym boiynşa qaladaǧy «Ulybka» stomatologiiasyna joldady, – deidı 19 jasar qala tūrǧyny. Jalpy atalǧan jobaǧa 29 jasqa deiıngı müldem jūmys ötılımı joq jūmyssyz jastar, onyŋ ışınde NEET sanatyndaǧy jastar qatysa alady. Sonymen qatar, alǧaşqy jūmys ornyna ornalasuǧa köp balaly nemese az qamtylǧan otbasy müşelerıne, eŋbekke qabılettı mügedekter men tehnikalyq jäne käsıptık mamandyq ielerıne basymdyq berıledı. Jūmyspen qamtu ortalyǧy jūmys beruşılermen kelısımşart jasap, oqu ornyn aiaqtaǧan jastardy 24 ai jūmyspen qamtidy. Jobaǧa qatysuşynyŋ eŋbekaqysy – 20 AEK. Halyqty jūmyspen qamtu ortalyǧy jūmystyŋ alǧaşqy 12 aidyŋ eŋbekaqysyn subsidiialaidy. Ümıtkerler tırkelgen mekenjaiy boiynşa jūmyspen qamtu ortalyǧy bölımşelerıne jeke kuälıgı men bılımı turaly qūjat köşırmesın tapsyryp, ötınım bere alady. Aita ketsek, bügıngı taŋda jobaǧa qatysuǧa 50-ge juyq jas joldanyp, onyŋ 45-ı qaladaǧy türlı mekemeler men käsıporyndarǧa jūmysqa kırıstı.