Şymkentte el Täuelsızdıgınıŋ 30-jyldyǧyna arnalǧan «30 igı ıs» aksiiasy jalǧasyn tabuda. Aksiia aiasyndaǧy kezektı ıs-şara «Bolaşaq» tırek-qimyly būzylǧan balalardy oŋaltu ortalyǧynda öttı. Būl joly «Auyl» halyqtyq-demokratiialyq patriottyq partiiasy ortalyqqa qaiyrymdylyq kömek körsettı.
Atap aitqanda, «Auyl» HDPP Şymkent qalasy boiynşa filialynyŋ töraǧasy, qalalyq mäslihat deputaty Qanatbek Dosaliev jäne partiia atynan sailanǧan mäslihat deputattary Quanyş Däuletaliev pen Ǧani Qanjıgıtūly, sondai-aq partiianyŋ Nūr-Sūltan qalasyndaǧy ortalyq apparatynyŋ qala boiynşa filial koordinatory Ǧalymjan Orazbaev bastaǧan «auyldyqtar» oŋaltu mekemesıne «qūrǧaq bassein», keŋse tauarlaryn jäne balalardyŋ oi-örısın damytuǧa, qimyl-qozǧalysty retteuge arnalǧan oiynşyqtar men emdık qūraldardy syiǧa tartty. Täuelsızdık mereitoiy qarsaŋynda ūiymdastyrylǧan ıs-şara qaiyrymdylyq maqsatty közdep, ortalyq ūjymy men balalardyŋ esınde qalar sättı oqiǧaǧa ainaldy.
— Elımızdıŋ aituly merekesı Täuelsızdık halyqqa şattyq köŋıl küi syilap, ädemı körınısterımen el jadynda saqtalyp qalu üşın mereitoiǧa orailastyryp sauaby mol igı amaldardy köbırek jasauymyz kerek. Osy maqsatqa orai balalardyŋ külımdegen közderı men bal-būl janǧan quanyşty jüzderın köru üşın «Bolaşaq» oŋaltu ortalyǧyna arnaiy at basyn būryp, büldırşınderge daiyndaǧan syi-siiapatymyzdy tartu ettık. Ūlt saulyǧy ärqaşan memlekettıŋ basty strategiialyq baǧyty bolyp qala beredı. Sondyqtan qaladaǧy tırek-qimyl qozǧalysy būzylǧan bırden bır osy mekemege arnaiy qaiyrymdylyq ıs-şarasyn ūiymdastyrdyq. «Auyl» partiiasy bastaǧan mūndai igı ıster keiın de jalǧasyn tabady, - dedı Şymkent qalasy boiynşa saiasi ūiym jetekşısı Qanatbek Dosaliev.
Aita ketu kerek, «Bolaşaq» tırek-qimyly būzylǧan balalardy oŋaltu ortalyǧy, būl ükımettık emes ūiym jäne «JİTS-ten balalardy qorǧau» qaiyrymdylyq qoǧamdyq qoryna qarasty mekeme. Ortalyq basşysy Janetta Jazyqbaevanyŋ mälımdeuınşe, oŋaltu mekemesı ekı baǧyt boiynşa qyzmet atqarady. Onyŋ bırınşısı, 2006 jyly därıgerler qatelıgınen AİTV dertıne şaldyqqan 268 bala men olardyŋ ata-anasyna psihoäleumettık, zaŋnamalyq kömekter körsetu bolsa, ekınşısı, memlekettık tapsyrys boiynşa psihonevrologiialyq jäne tırek-qimylynda auytquy bar balalarǧa medisinalyq em-dom şaralaryn jürgızedı. Qor 2006 jyly AİTV dertın jūqtyrǧan säbilerdıŋ ata-analarynyŋ qoldauymen aşylǧan.
Änuar JŪMAŞBAEV
