ŞYMKENTTEGI SAUDA ORTALYQTARYNDA DENSAULYQ KÜNI ÖTUDE

Şymkenttegı ırı sauda ortalyqtarynda därıgerler tūrǧyndardy qabyldai bastady. QR Täuelsızdıgınıŋ 30 jyldyǧyna orailastyrylǧan densaulyq künı aiasynda «Şymkent-Plaza», «Mega-Planet», «Sever» sauda oiyn-sauyq ortalyqtarynyŋ qyzmetkerlerı men qala tūrǧyndaryn beiındı mamandar tegın qabyldap, medisinalyq kömek körsetedı. Biylǧy densaulyq künınıŋ basty taqyryby – «Denı saudyŋ – jany sau» atty ūranmen ūiymdastyrylyp otyr. Qaladaǧy adam köp şoǧyrlanatyn sauda ortalyǧynyŋ bırıne arnaiy kelgen qalalyq №1 emhananyŋ bas därıgerı Mahambet Beiseuov pandemiia kezınde densaulyq künınıŋ atalyp ötuı maŋyzdy ekenın aitty. – Qoǧamdyq orynda medisina mamandarynyŋ qabyldau jūmystary saǧat 10:00 men 18:00 aralyǧynda jüredı. Kez-kelgen qala tūrǧyny ortalyqqa kelıp därıgerdıŋ tekseruınen öte alady. Taŋǧy uaqyttan berı 50-den astam adam kelıp, densaulyǧyna qatysty şaǧymdaryn därıgerlerge aityp, tegın keŋes aldy. Bızde pediatr, kardiolog, nefrolog, okulist, terapevt, nevropatolog därıgelerı konsultasiia berıp jatyr. Aksiianyŋ bır erekşelıgı keluşılerge därıgerlerdıŋ qabyldauyna jazylu mındettelmeidı. Keibır beiındı medisina qyzmetkerlerı qūrylǧylarynyŋ bolmauyna bailanysty kele almady, - dedı bas därıger. Sauda ortalyǧynda jūmys ısteitın Edıl Aqbaev därıgerlerdıŋ keŋesıne jügınıp, medisina salasynyŋ mamandaryna alǧysyn bıldırdı. – Köbıne jūmystan qol bosamai densaulyǧymyzǧa köŋıl bölmei ketetınımız bar. Ortalyǧymyzǧa därıgerlerdıŋ özı ızdep kelıp tūrǧanda, mūndai mükındıktı jıbermeiın dep kardiolog, okulisttıŋ keŋesın aldym. Közım men jüregım mazalaityn. Emhanalarǧa barsaq kezek köp bolady. Aldyn ala jazylu arqyly qabyldaidy. Būl jerde ızdegen därıgerlerımnıŋ kelgenı qunatyp tūr. Qolyma resept jazyp berdı. Endı em qabyldap, densaulyǧymyzǧa da qaraimyz. Osyndai aksiialar jiı bolyp tūrsa, halyq üşın paidaly ǧoi, - dedı ol. Densaulyq künınıŋ aiasynda qalanyŋ şalǧai audandarynda da beiındı mamandardyŋ tekseruı ötude. Atap aitqanda, №11 qalalyq emhanasyna qarasty «Aqtas» därıgerlık ambulatoriiasynda №10 qalalyq emhanasyna qarasty «Qainar» FAP-de, №12 qalalyq emhanasyna qarasty «Şapyraşty» därıgerlık ambulatoriiasynda, №7 qalalyq emhanasyna qarasty «Toǧys» därıgerlık ambulatoriiasynda halyqqa medisinalyq kömek körsetude.