Qazaqstan Respýblıkasy Táýelsizdiginiń 30 jyldyǵy qarsańynda Ulttyq qaýipsizdik komıteti «Memlekettik shekara» kitabyn shyǵardy. Jańa kitap memlekettik shekarany kúzetý isine ólsheýsiz úles qosqan jasyl kúnqaǵarly jaýyngerlerge arnalǵan. «Memlekettik shekara» kitabyndaǵy áńgimeler men ocherkter qataryna táýelsiz Qazaqstannyń Shekara qyzmetiniń dańqty shejiresindegi aıtýly degen oqıǵalar kirdi.
Munda shekara jaýyngerleriniń tynymsyz kúnderi, árbir qazaqstandyq úshin qasıetti sanalatyn el shebin kúzetý kezindegi bastarynan keshirgen shıeleniske toly oqıǵalarymen erekshelenedi. Kitapty qolyna alyp, betterin ashqan sátten bastap, oqyrman ózin keıipkerlermen birge el shebinde júrgendeı, birese jaıaý, birde atpen, taǵy birde ıtpen birge qarýyn sert ustap, taý asyp, tas basqandaı, sý keship, teńizdiń tolqyndaryna qarsy júzgendeı áserge bólenedi.
Shekaradan ótkizýge qatań tyıym salynǵan esirtki zatyn tasymaldaýshyny quryqtap, taýdyń ishinde mal baǵyp buıyǵy tirshilik keship jatqan shopannyń otbasyn kepilge alǵan qylmyskerden taısalmaǵan shekarashyny sý da, órt te alǵan betinen qaıtara almaıtynyn «Memlekettik shekara» syr qylyp aıtyp beredi.
Kitapty qolyna alǵan shekarashy ardager ózimen birge qyzmet atqarǵan qarýlasymen qaýyshady, al kishi býyn shekarashyny jańa erlikke jeteleıdi. Bul kitap – qoǵam damýyna úles qosa alatyn úlgili eńbek. Ásirese, ósip kele jatqan jastarǵa táýelsiz elimizdiń tynyshtyǵy shekaradan bastalatynyn úıretetin tamasha dúnıe. Óıtkeni shekara – Otanymyzdyń aınasy.
«Memlekettik shekara» - shekarashylar úshin ǵana emes, áskerı ómirden tysqary qarapaıym adamdar úshin de oqylymdy.
