Bügın Şymkent qalasynyŋ äkımı Mūrat Äitenov Serbiiada ötken bokstan eresekter arasyndaǧy älem chempionatynyŋ kümıs jüldegerı Mahmūd Sabyrhanǧa tūrǧyn üi sertifikatyn tabystady. Kezdesuge Şymkent qalasy boks federasiiasynyŋ töraǧasy A. Tūrysbekov qatysty.
Bylǧary qolǧap şeberıne qala äkımdıgı men boks federasiiasy bırlesıp «Standart» tūrǧyn üi keşenınen 1 bölmelı päter berıldı. Sportşyny jetıstıgımen qūttyqtaǧan qala basşysy älemdık arenada aldaǧy uaqytta ülken jeŋısterge jetetıne senımdı ekenın aitty.
«Elımızdıŋ täuelsızdık alǧanyna biyl 30 jyl toldy. Osy uaqyt aralyǧynda Qazaqstan sportşylary halyqaralyq arenada qazaq elınıŋ abyroiyn asqaqtatyp keledı. Olardyŋ qatarynda özıŋ sekıldı talantty boksşylar bar. 20 jasta älem chempionatynyŋ finalynda synǧa tüskennıŋ özı ülken erlık jäne jetıstık. Sen üşın ülken sporttaǧy ülken jeŋıster baspaldaǧy bastaldy. Endı jattyǧudy küşeitıp, būdan da biık belestı baǧyndyryp, qazaqstandyqtardy quantuǧa küş jıgerıŋdı sal. Senderge qarap jastarymyz sportpen şūǧyldanuǧa jäne salamatty ömır saltyn ūstanuǧa ūmtylady. Jetıstıkterıŋdı körıp sender siiaqty boluǧa talpynady. Sportşylarymyzdyŋ jetıstıkterı memlekettıŋ bedelın arttyruǧa septıgın tigızedı. Sondyqtan bız aldaǧy uaqytta ülken jeŋıster kütemız»,-dedı äkım.
Eske salsaq, Belgradta ötken älem chempionatynda bokstan Qazaqstan erler qūramasy jalpy komandalyq esepte ekınşı orynǧa tūraqtady. Temırtas Jüsıpov pen Säken Bibosynov älem chempiondary atansa, Mahmūd Sabyrhan men Serık Temırjanov kümıs jüldege, Abylaihan Jüsıpov qola jüldege ie boldy.
Basqa materialdar
Adyrna.kz ūlttyq portalynyŋ maŋyzdy aqparattaryna jazylu
Soŋǧy jaŋalyqtar turaly habardar bolyŋyz