Qazaqstan Respublikasy Täuelsızdıgınıŋ 30 jyldyǧyna orai, Şymkent qalalyq densaulyq saqtau basqarmasy «Denı saudyŋ jany sau!» taqyrybynda densaulyq künı aksiiasyn ötkızdı. Atalǧan aksiia aiasynda qalalyq emhanalardyŋ beiındı mamandary «Şymkent-Plaza», «Mega-Planet», «Sever» siiaqty ırı sauda ortalyqtarynda satuşylar men qala tūrǧyndaryn tegın qabyldap, medisinalyq kömek körsettı.
«Pandemiia kezınde osyndai densaulyq aksiialaryn ūiymdastyru öte maŋyzdy. Mūndaǧy bır erekşelık, keluşılerdı beiındı medisina qyzmetkerınıŋ qabyldauyna aldyn ala jazyluǧa mındettemeidı»,- dedı, qalanyŋ adam köp jinalatyn sauda ortalyqtarynyŋ bırıne arnaiy kelgen №1 emhananyŋ bas därıgerı M.Beiseuov.
Sauda ortalyǧynda jūmys ısteitın Edıl Aqbaev: «Köbıne jūmystan qol bosamai densaulyǧymyzǧa köŋıl bölmei ketetınımız ras. Aldymyzǧa därıgerlerdıŋ özı ızdep kelıp tūrǧanda, mūndai mükındıktı jıbermeiın dep kardiolog pen okulisttıŋ keŋesın aldym. Közım men jüregım mazalaityn. Emhanalarǧa barsaŋ kezek köp bolady. Aldyn ala jazylu arqyly qabyldaidy. Būl jerde ızdegen därıgerlerımnıŋ kelgenıne qunayp tūrmyn. Qolyma resept jazyp berdı. Endı em qabyldap, densaulyǧymyzǧa da qaraimyz. Osyndai aksiialar jiı bolyp tūrsa, halyq üşın paidaly ǧoi, - dep öz oiymen bölısıp, därıgerlerge alǧysyn bıldırdı.
Sonymen qatar, «Denı saudyŋ – jany sau!» aksiiasy aiasynda qalanyŋ şalǧai audandarynda da beiındı mamandardyŋ tekseruı ötude. Atap aitqanda, №11 qalalyq emhanasyna qarasty «Aqtas» därıgerlık ambulatoriiasynda №10 qalalyq emhanasyna qarasty «Qainar» FAP-de, №12 qalalyq emhanasyna qarasty «Şapyraşty» därıgerlık ambulatoriiasynda, №7 qalalyq emhanasyna qarasty «Toǧys» därıgerlık ambulatoriiasynda halyqqa medisinalyq kömek körsetude.
Şymkent qalasynyŋ Aqparattyq-kommunikasiialyq ortalyǧy
