Elımızdıŋ Tūŋǧyş Prezidentı – Elbasy Nūrsūltan Nazarbaev Täuelsızdıktıŋ 30 jyldyq merekesı qarsaŋynda «Täuelsızdık taǧylymy» atty maqala jariialady. Būl maqalada Elbasy öz halqyn aituly merekemen qūttyqtai otyryp, osy orda būzar otyz jyl uaqyt aralyǧynda jas memleket Qazaqstannyŋ baǧyndyrǧan belesı men asqan asuy tolaǧai ekenın tılge tiek ettı.
«Men otyz jyl boiy halqymdy qanattyǧa qaqtyrmai, tūmsyqtyǧa şoqyttyrmai, qairaŋǧa qaldyrmai, älemdık örkeniettıŋ aldyŋǧy şebıne, düniedegı eŋ damyǧan 40 eldıŋ qataryna qostym. Osy jyldar ışınde älemdık ǧylym men mädeniettıŋ eŋ üzdık jetıstıkterın meŋgergen jaŋa ūrpaq qalyptasty» dei kele, «Yntymaǧy jarasqan eldıŋ tabysy tasyp, abyroiy asady. Berekesı qaşqan eldıŋ quaty kemıp, qūty qaşady. Otyz jyl ışınde bız ǧasyrlarǧa bergısız damu jolynan öttık», – dedı Tūŋǧyş Prezident.
Taǧylymy tereŋ maqala barysynda Nūrsūltan Äbışūly egemendıktıŋ Tuyn jelbıretu babalardyŋ qanşama ǧasyrdan berı asqaq armany bolǧanyn, oǧan jetu jolyndaǧy qiyndyqtar men tarihqa qasıretpen taŋbalanyp jazylǧan zūlmat jyldardy keleşek ūrpaqtyŋ jadyna saldy.
«Azat elımızdıŋ jastary täuelsızdıkke barar joldyŋ qandai azapty bolǧanyn, qandai qūrbandyqtar men synaqtar – 1916 jylǧy ūlt-azattyq köterılıs, azamat soǧysy, aşarşylyqtyŋ alapat ekı tolqyny, quǧyn-sürgın men repressiialar, Ūly Otan soǧysy, tyŋ igeru jyldaryndaǧy jappai qonys audarudyŋ zardaby arqyly jetkenımızdı bıluı kerek. Mūnyŋ özı ötken tarihty qasterlep, odan sabaq alu üşın qajet. Menıŋ «Täuelsızdık – babalar qanymen kelgen kielı qūndylyq» deitınım osydan» dei otyryp, «Täuelsızdık – ata-babalarymyzdyŋ azattyq jolyndaǧy jan alysyp, jan berısken san ǧasyrlyq küresınıŋ zaŋdy jalǧasy, halyqaralyq qūjattarmen bekıtılıp, mäŋgılıkke berılgen syiy» dep, oiyn tüiındedı.
Osy oraida Tūŋǧyş Prezident: «Täuelsızdık te baqyt siiaqty, baǧalaǧan adamnyŋ, aialaǧan qoǧamnyŋ qolyna tūraqtaidy. Halqy tatu, ekonomikasy quatty, saiasi jüiesı tūraqty, märtebesı biık, abyroiy asqaq Qazaqstannyŋ bolaşaǧy keşegıden kemel, bügıngıden nūrly ekendıgıne kämıl senemın» dep aitqandai, elımızdıŋ erteŋıne bek senımmen qaraitynymdy jetkızgım keledı.
Nūrǧazy BŪHARBAI, Şymkent qalasynyŋ mäslihat deputaty
