Täuelsızdıktıŋ 30 jyldyǧyna orai «Ten qogam» äleumettık qoldau ortalyǧy aşyldy. Būl ortalyq mümkındıgı şekteulı azamattarǧa türlı qyzmetter körsetıp, olardyŋ bas qosatyn ornyna ainalmaq. Qala äkımı Mūrat Äitenov ortalyqty aralap, onda körsetıletın qyzmettermen tanysyp şyqty.
M.Äitenovtıŋ aituynşa, mümkındıgı şekteulı azamattarǧa qoldau körsetu – memlekettıŋ äleumettık saiasatynyŋ basym baǧyttarynyŋ bırı. Olarǧa memlekettık järdemaqymen qosa medisinalyq oŋaltu jäne em türlerı körsetıledı. Äleumettık portal arqyly kömekşı qūraldarmen tolyq qamtamasyz etıledı.
–Şymkent qalasynda 36 myŋnan astam mümkındıgı şekteulı jan ömır sürude. Onyŋ ışınde 6 myŋnan astamy kämelet jasqa tolmaǧandar. Bız olarǧa özderın qoǧamnyŋ tolyqqandy müşesı ekenın sezındırumız qajet. Būl rette mügedekterdı oŋaltu men olardy qoǧamǧa kırıktıru mındetterın sapaly jüzege asyrudyŋ maŋyzy zor. Bügın aşylyp otyrǧan äleumettık qoldau ortalyǧy atalǧan mındettı oryndauǧa septıgın tigızedı, – dedı Mūrat Düisenbekūly.
«Teŋ qoǧam» äleumettık qoldau ortalyǧy «bır tereze» qaǧidasymen 5 baǧytta qyzmet körsetedı. Mūnda därıger men psiholog jūmys ısteidı. Mümkındıgı şekteulı azamattardy jūmysqa ornalastyruǧa basa nazar audarylǧan. Sondai-aq, būl jerde mümkındıgı şekteulı azamattar äleumettık portaldyŋ qyzmetın öz betınşe aludy üirenuıne bolady.
Aidar QŪLJANOV, Foto Serık QOSAEV.
