Bügın Nūr-Sūltan qalasynda QR Prezidentı janyndaǧy Ortalyq kommunikasiialar qyzmetı alaŋynda Şymkent qalasynyŋ äkımı Mūrat Äitenovtıŋ qatysuymen brifing öttı. Onda üşınşı megapolis äkımı Memleket basşysy tapsyrmalarynyŋ oryndaluy men qalanyŋ äleumettık-ekonomikalyq damuy turaly baiandady.
Şymkentte ötken on bır aida barlyq salada ekonomikalyq ösım dinamikasy baiqaldy. Ekonomikanyŋ negızgı sektorlaryna jeke toqtalar bolsaq, ötken jyldyŋ tiıstı kezeŋımen salystyrǧanda önerkäsıp önım kölemınıŋ indeksı 6,3 paiyzǧa, investisiia kölemı – 55 paiyzǧa, qūrylys jūmystary – 9,6 paiyzǧa, paidalanuǧa berılgen tūrǧyn üiler alaŋy – 63,6 paiyzǧa, bölşek sauda kölemı – 9,8 paiyzǧa artqan.
Mūrat Äitenov tūrǧyndardyŋ ömır süru sapasyn arttyru, olarǧa jaily ärı qauıpsız orta qalyptastyru jönındegı mındetter bırınşı kezekte atqaryluy tiıs jūmystar retınde belgılenıp, qalanyŋ injenerlık infraqūrylymyn damytuǧa airyqşa köŋıl bölıngenın jetkızdı.
«Bes jyl ışınde halyqty 100 paiyz taza auyz sumen qamtamasyz etuımız qajet. Bügıngı künge Şymkentte 5 eldı meken kestemen berılse, 7 eldı meken tasymaldy auyz sumen qamtylǧan. Aǧymdaǧy jyly 16 mlrd. teŋgege su qūbyrynyŋ qūrylysy jürgızılude. Nätijesınde 25 myŋnan astam adam sapaly auyz sumen qamtylady. Jospar boiynşa 2023 jyly auyz su mäselesı tolyǧymen şeşıledı. 16 eldı mekende elektr energiiasynyŋ sapasy tömen. Biyl 9,8 mlrd. teŋgege 19 nysannyŋ qūrylysy jürgızılude. Nätijesınde qamtu deŋgeiı 95 paiyzdan 97 paiyzǧa jetedı. Aǧymdaǧy jyly gazben qamtu boiynşa 5,9 mlrd. teŋgege 18 nysannyŋ qūrylysy jürgızılude. Qalany gazdandyru mäselesı 2025 jyly tolyǧymen şeşıledı»,-dedı qala äkımı.
Biylǧy jyly tūrǧyndardy kärız jüiesımen qamtu deŋgeiı 52 paiyzdan 54 paiyzǧa jetedı. Damu jospary boiynşa 2025 jyly kärızben qamtu körsetkışı 75 paiyzǧa jetpek.
Şymkent qalasy äkımdıgınıŋ baspasöz qyzmetı
