Şymkenttıŋ damuy Memleket basşysynyŋ tūraqty nazarynda ekenın Ortalyq kommunikasiialar qyzmetınde ötken brifingte Şymkent qalasynyŋ äkımı Mūrat Äitenov mälımdedı. Şahardyŋ ömır süruge jaily qalaǧa ainaluy jäne mūnda qäuıpsız orta qalyptastyru jūmystary josparly türde ıske asyp jatqanyn jetkızdı.
«Qalada 747 äleumettık maŋyzy bar köşelerdıŋ 220-sy jaryqtandyrylǧan. Aǧymdaǧy jyly memlekettık-jekeşelık ärıptestıgı aiasynda 71 köşede qūrylys jūmystary aiaqtaldy. Nätijesınde, jaryqtandyru deŋgeiı 29 paiyzdan 43 paiyzǧa jetedı. 2025 jyly 75 paiyzǧa jetkızu közdelgen», - dedı qala äkımı.
Elımızdegı üşınşı megapoliste qoǧamdyq qauıpsızdıktı qamtamasyz etu üşın jaŋadan 3177 beinebaqylau kameralary ornatylǧan. Nätijesınde, qala aumaǧyn şolu körsetkışı 3 esege artqan. Būl şaralar qylmys pen qūqyqbūzuşylyqtyŋ aldyn-aluǧa ülken septıgın tigızude. Qazırdıŋ özınde bırqatar körsetkışterdıŋ jaqsarǧany baiqalady. Salystyrmaly türde aitar bolsaq, aǧymdaǧy jyldyŋ 11 aiynda jalpy qylmystardyŋ sany 6 paiyzǧa azaiǧan. Sonymen bırge, halyq tyǧyz ornalasqan şaǧyn audandarda zamanaui 100 mobildı polisiia beketın salu josparlanǧan. Qazırgı taŋda, 7 mobildı bekettıŋ qūrylysy aiaqtaluǧa jaqyn. Kelesı jyly būl baǧytta qarqyndy jūmystar jürgızılmek.
Şymkent qalasy äkımdıgınıŋ baspasöz qyzmetı
