Shymkent qalasynda QR Táýelsizdiginiń 30 jyldyǵy qarsańynda qazaq teatrynyń tuńǵysh rejısseri Jumat Shanınge arnalǵan eskertkish ashyldy.
Eńseli eskertkishtiń ashylaýyna qala ákimi Murat Áıtenov, qala máslıhatynyń hatshysy men depýtattary, J.Shanınniń urpaqtary jáne zııaly qaýym ókilderi qatysty.
Ulttyń uly tulǵalaryna qurmet kórsetý perzenttik paryz ekenin alǵa tartqan M.Áıtenov jıylǵan qaýymdy Táýelsizdik merekesimen quttyqtady.
–Shymkent teatry Jumat Shanın esimin 1972 jyly ıelendi. Araǵa 50 jyl salyp, teatr aldyna qaıratkerdiń eńseli eskertkishi tuǵyrǵa qondy. Qazaq teatr óneriniń ustazy bolǵan tulǵanyń ǵıbratty ǵumyry men mol murasy – halqymyzdyń asyl qazynasy. Jumat Shanınge qurmet kórsetý arqyly biz mádenıet qaıratkerlerine qurmet kórsetemiz. Ult tarıhyndaǵy alǵashqy kásibı teatr mamanynyń ómirlik tanymy – óskeleń urpaqtyń boı túzer baǵyty bolatynyna senimdimin. Barshańyzdy Shymkenttiń mádenı ómirindegi erekshe sátpen quttyqtaımyn!
Elimiz aman, Táýelsizdigimiz tuǵyrly bolsyn!-dedi qala ákimi.
Jumat Shanın atyndaǵy akademııalyq qazaq drama teatrynyń aldyna ornatylǵan eskertkishtiń bıiktigi tuǵyrymen qosqanda 5 metrge jýyqtaıdy. Avtory – QR Mádenıet qaıratkeri, QR Sýretshiler Odaǵynyń múshesi Ábdýahat Muratbaev.
Qazaqstandaǵy tuńǵysh qazaq teatr óneriniń negizin qalaǵan, ony kásibı deńgeıde qalyptastyryp, shyǵarmashylyq jaǵynan ósý jolynda zor eńbek sińirgen tulǵanyń týǵany bıyl 129 jyl.
Shymkent qalasy ákimdiginiń baspasóz qyzmeti
