Bügın Şymkent qalasynda el Täuelsızdıgınıŋ 30 jyldyq mereitoiyna arnalǧan «El baqytyn terbetken – Täuelsızdık!» atty saltanatty jiyn öttı. Şaraǧa Qazaqstan Respublikasynyŋ Memlekettık hatşysy Qyrymbek Köşerbaev, qala äkımı Mūrat Äitenov, ziialy qauym ökılderı, barlyq salanyŋ mamandary men eŋbek azamattary qatysty.
Merekelık ıs-şara Memlekettık gimnnıŋ oryndaluymen bastaldy.
Jiynda söz alǧan qala basşysy barşa jūrtşylyqty jetken biıgımızdı saralap, bolaşaǧymyzdyŋ baǧdaryn belgılep bergen Täuelsızdıktıŋ 30 jyldyq merekesımen qūttyqtady.
«Elbasymyzdyŋ köşbasşylyǧymen Qazaqstan halqy memleket qūru missiiasyn oryndady. Nūrsūltan Äbışūly özınıŋ «Täuelsızdık sabaqtary» maqalasynda Qazaqstannyŋ älemde öz tuyn tūǧyrǧa qondyrǧan ekı jüzden asa eldıŋ ışınde bar-joǧy 30 jyldyŋ ışınde alǧaşqy 40 eldıŋ qataryna qosylǧanyn atap öttı. Osy jyldar halqymyz jürıp ötken jol jasampazdyqtyŋ Ūly däuırıne ainaldy. Ärbır jyl ǧasyr jügın arqalady. Halqymyzdyŋ myqty memleket qūru, baquatty ömırge jetu jolyndaǧy ūly köşıne baitaq Qazaqstan jūrty tügel üles qosty. Bügıngı Qazaqstannyŋ qalyptasqan memleketke ainaluy, älemdık deŋgeide tanylyp, moiyndaluy jäne quatty ekonomika qūryp, güldenuı – halqymyzdyŋ eren eŋbegınıŋ nätijesı»,- dedı öz qūttyqtau sözınde M.Äitenov.
Sonymen bırge äkım saltanatty jiynǧa arnaiy kelıp qatysyp, quanyşty sättı bölısken Qazaqstan Respublikasynyŋ Memlekettık hatşysy Qyrymbek Eleuūly Köşerbaevqa Şymkent tūrǧyndary atynan alǧysyn jetkızıp sahnaǧa şaqyrdy.
Qazaqstan Respublikasynyŋ Memlekettık hatşysy Qyrymbek Köşerbaev qala tūrǧyndaryn elımız üşın maŋyzdy tarihi belespen qūttyqtai otyryp, qazaqstandyqtar osy jyldarda tūǧyry myǧym, quatty memleket qūra bılgendıgın atap öttı.
«Bız – yntymaqty ūran, tatulyqty tu etken beibıt halyqpyz. Bügıngı memleketımızdıŋ qarqyndy damuy – tūraqty saiasat pen ışkı bırlıktıŋ arqasy. Ūlttyq qasietımız ben ūlttyq qūndylyqtarymyzdy ūlyqtai bılgenımızdıŋ jemısı. Sondyqtan bırlıgımız bekem, tırlıgımız tiianaqty bolǧanda ǧana Täuelsızdıktıŋ tuy mäŋgı jelbıreitının esten şyǧarmaǧanymyz abzal.Otyz jylda qazaq halqy asyqqanyna jetıp, aŋsaǧanyn kördı. Täuelsızdık ūlttyq namysymyzdy oiatty. Täuelsızdık qazaqty älemge azattyq süigış, ruhy biık, namysy berık halyq retınde tanytty. Ata-babamyz ǧasyrlar boiy armandap ötken egemen el bolu märtebesın köru – bügıngı ūrpaqqa būiyrǧan zor baqyt. Osy otyz jylda memleket jaŋǧyryp, ūlt qaita tüledı. Täuelsızdık jyldary boi kötergen ǧajaiyp elorda Otanymyzdyŋ jüregıne, Täuelsızdıgımızdıŋ tıregıne ainaldy. Halqymyz maqtan etetın elımızdıŋ barlyq öŋırlerınde de ūlanǧaiyr jasampazdyq ıster atqaryldy. Mūnyŋ özı bızdıŋ quatty el ekenımızdı paş ettı. Sızderdıŋ qalalaryŋyz da basqa öŋırler siiaqty el ekonomikasynyŋ damuyna jyldan-jylǧa üles qosyp keledı. Elımızdıŋ oŋtüstıgınde ornalasqan üşınşı megapolis, qazaqylyqtyŋ qaimaǧy saqtalǧan şyraily Şymkent qalasyna Elbasynyŋ Jarlyǧymen arnaiy status berılgennen keiın şahardyŋ damuy tyŋ serpın aldy. İndustrialandyru baǧdarlamasy boiynşa jalpy qūny 221,5 milliard teŋgenı qūraityn 127 joba ıske asty. 2018 jyldan berı qala ekonomikasyna 1,3 trillion teŋge investisiia tartyldy. Aldaǧy uaqytta da būl qarqyndy tömendetpeu kerek»,-dedı Memlekettık hatşy.
Qyrymbek Köşerbaev ūlysymyz üşın ūlyq, memleketımız üşın märtebelı mereke – Täuelsızdıktıŋ 30 jyldyǧy qarsaŋynda Qazaqstan Respublikasynyŋ Prezidentı Qasym-Jomart Kemelūly Toqaev elımızdıŋ qoǧamdyq-saiasi, äleumettık-ekonomikalyq damuyna erekşe üles qosyp jürgen azamattardy memlekettık nagradalarmen marapattady. Olardyŋ qatarynda Şymkent şaharynyŋ tūrǧyndary da bar ekenın aityp, elımızdıŋ ösıp-örkendeuıne eŋbek sıŋırgen 34 azamatty qala äkımı Mūrat Äitenovpen bırge tabystady.
Saltanatty jiyn öner jūldyzdarynyŋ merekelık konsertımen jalǧasty.
Şymkent qalasy äkımdıgınıŋ baspasöz qyzmetı
