Táýelsizdiktiń 30 jyldyǵy aıasynda megapolıstiń Túrksib aýdanynda, «Jeltoqsan» saıabaǵynda eskertkish tas qalandy, dep habarlaıdy QazAqparat.
Sharaǵa Jeltoqsan birlestiginiń ókilderi, qoǵam qaıratkerleri, aqyn-jazýshylar men Almaty qalasy ákiminiń orynbasary Erjan Babaqumarov qatysty. Erjan Babaqumarovtyń aıtýynsha, «Jeltoqsan» saıabaǵy byltyr ashyldy. Al búgin osy jerde monýmenttiń irgetasy qalandy.
Bul Jeltoqsan oqıǵasynyń 35 jyldyǵyna oraılastyrylyp otyr. «Táýelsizdiktiń 30 jyldyǵyna daıyndyqty biz bir jyl buryn bastap kettik.
«Jeltoqsan» saıabaǵynyń orny men ataýy jeltoqsan birlestikteriniń ókilderimen birge anyqtaldy. Almaty ákimi Baqytjan Saǵyntaev monýmentti ornatý týraly tıisti sheshim qabyldady. Bul kún bizdiń qalamyzdyń tarıhyndaǵy mańyzdy oqıǵa bolatynyna senimdimin», - dedi qala ákiminiń orynbasary. Erjan Babaqumarov jınalǵandardy kele jatqan Táýelsizdik kúnimen quttyqtady.
«Saıabaqtyń ashylýy, bolashaqta eskertkish ornatý – bul jeltoqsan batyrlaryna qurmet qana emes, olardyń erlikterin máńgi este saqtaý, bolashaq urpaqqa jetkizý. «Jeltoqsan» saıabaǵy úlken ári oǵan keletinder de kóp bolady – ony abattandyrý jumystary jalǵasýda. Buryn bul qaraýsyz qalǵan skver bolatyn, al endi qala turǵyndary jańa qoǵamdyq keńistikti aralaı otyryp, bizdiń halqymyzdyń tarıhymen tanysady», - dep atap ótti ol.
Barlyq quqyqtar qorǵalǵan. inform.kz belsendi siltemeni paıdalanyńyz https://www.inform.kz/kz/almatyda-zheltoksan-eskertkishinin-irgetasy-kalandy_a3873508
