Nūrlan Nyǧmatulin Täuelsızdıktıŋ 30 jyldyǧyna orai mäjılısmenderge memnagradalar tapsyrdy

Täuelsızdıktıŋ 30 jyldyq merekesıne orai, Mäjılıs Töraǧasy Nūrlan Nyǧmatulin deputattar men Apparat qyzmetkerlerıne Prezident Jarlyǧymen berılgen memlekettık nagradalardy tapsyrdy, dep habarlaidy QazAqparat tömengı paalatanyŋ baspasöz qyzmetıne sılteme jasap. Mäjılıs spikerı deputattyq korpusty Täuelsızdıktıŋ 30 jyldyǧymen qūttyqtai otyryp, Qazaqstannyŋ osy jyldardaǧy barlyq tabystary men jetıstıkterı barşa qazaqstandyqtardyŋ eŋbegınıŋ jäne el basşylyǧynyŋ strategiialyq bastamalaryn ıske asyrudyŋ nätijesı ekenın atap öttı. Būl eŋ aldymen, Tūŋǧyş Prezidentımız, Elbasy Nūrsūltan Äbışūly Nazarbaevtyŋ eren eŋbegınıŋ, sonymen bırge, ärqaşanda Prezidentımızge tırek bolyp, qoldau bıldırıp kele jatqan halqymyzdyŋ bereke-bırlıgınıŋ jemısı. Qazırgı uaqytta Memleket Basşysy Qasym-Jomart Kemelūly Toqaev osy tolaǧai tabystarymyzdy saqtap, strategiialyq damu baǧytyn odan ärı jalǧastyryp keledı, - dedı Nūrlan Nyǧmatulin. Sonymen qatar, Mäjılıs Töraǧasy elımız tarihymen bırge kele jatqan Parlamenttıŋ, onyŋ deputattarynyŋ da qosyp jatqan ülesı öte zor ekenın atap öttı. Memlekettık jäne qoǧamdyq qyzmettegı eŋbegı, eldıŋ äleumettık-ekonomikalyq jäne mädeni damuyna, halyqtar arasyndaǧy dostyq pen yntymaqtastyqty nyǧaituǧa qosqan eleulı ülesı üşın I därejelı «Barys» ordenımen Mäjılıs deputaty Dariǧa Nazarbaeva, III därejelı «Barys» ordenımen Bekbolat Tıleuhan marapattaldy. Mäjılıs Töraǧasy «Parasat» ordenın Amanǧali Berdalinge, Amanjan Jamalovqa, İrina Smirnovaǧa jäne Baqytbek Smaǧūlǧa tabystady.