Prezidenttıŋ Täuelsızdık künıne orai memlekettık nagradalardy tabystau saltanatynda söilegen sözı

Aqorda saitynda Memleket basşysy Qasym-Jomart Toqaevtyŋ Täuelsızdık künıne orai ötken memlekettık nagradalar men syilyqtardy tapsyru räsımınde söilegen sözı jariialandy.  Qadırlı qauym! Ardaqty aǧaiyn! Barşaŋyzdy qasterlı Täuelsızdıgımızdıŋ 30 jyldyq mereitoiymen şyn jürekten qūttyqtaimyn! Būl – ūlt mereiın ösıretın ūlyq meiram. Bız tarih tūrǧysynan alǧanda qysqa merzım ışınde jaŋa Qazaqstannyŋ negızın qaladyq. Tūǧyry berık, ekonomikasy quatty, bedelı biık memleketke ainaldyq. Mūnyŋ bärı, eŋ aldymen, Elbasy Nūrsūltan Äbışūly Nazarbaevtyŋ köregen saiasatynyŋ jemısı. Sonymen bırge, bükıl halqymyzdyŋ eren eŋbegınıŋ nätijesı. Kez-kelgen halyqtyŋ tabysqa jetuı azamattaryna bailanysty. Būl – ömırdıŋ zaŋy. Adam kapitaly myqty memleket barlyq qiyndyqty eŋsere alady. Täuelsızdık kezeŋınde halqymyz eldıktıŋ bıregei ülgısın körsettı. «Eŋbek – yrystyŋ būlaǧy, baqyttyŋ şyraǧy» dep beker aitylmaǧan. Şyn mänınde, bızdıŋ bügıngı jetıstıgımız – barşa halqymyzdyŋ ortaq jeŋısı. Jaŋa Qazaqstandy örkendetuge azamattarymyzdyŋ köbı sübelı üles qosty. Bügıngı mereilı sätte elımızdıŋ barşa azamattaryna tabandy eŋbegı üşın zor alǧys aitamyn. Bügın özderıŋızdı marapattai otyryp, Qazaqstandy körkeituge üles qosqan barlyq azamatqa rizaşylyq bıldıremız. Sızder naǧyz otanşyldyqtyŋ, käsıbi bılık pen adal eŋbektıŋ ozyq ülgısın körsettıŋızder. Öskeleŋ ūrpaq özderıŋızge qarap boi tüzeidı. Osydan bır jyl būryn men ülken mereitoidy şusyz, daŋǧazasyz, ysyrapsyz, naqty jūmystarmen atap ötu qajettıgı turaly aittym. Täuelsızdıgımızdıŋ 30 jyldyǧynda jaŋa, auqymdy reformalar qolǧa alyndy. Sondyqtan, būl jyldy nätijelı boldy deuge tolyq negız bar. Bız ekonomikany jäne äleumettık salany jan-jaqty jaŋǧyrtyp jatyrmyz. Indetke qaramastan, memleket otandyq bizneske qoldau körsetude.