Bügın elordada Täuelsızdık künı merekesı qarsaŋynda QR Prezidentı Qasym-Jomart Toqaevtyŋ Jarlyǧyna säikes elımızdıŋ saiasi, äleumettık-ekonomikalyq damuyna qosqan ülesı jäne belsendı qoǧamdyq qyzmetı üşın Ūlttyq keŋestıŋ bır top müşesı memlekettık nagradalarmen marapattaldy, dep habarlaidy QazAqparat.
«Aldymen barşaŋyzdy kele jatqan Täuelsızdık merekesımen qūttyqtaimyn. 30 jylda elımız bırqatar jetıstıkke qol jetkızdı. Onyŋ bärı halqymyzdyŋ yntymaqtastyǧy men eŋbegınıŋ arqasy. Täuelsızdık künı merekesı qarsaŋynda el damuyna eŋbegı sıŋgen türlı sala mamandary men tūlǧalar marapatqa ie bolyp jatyr. Olardyŋ qatarynda Ūlttyq keŋes müşelerı de bar. Ärine, quanyştymyz. Bügıngı marapatty Ūlttyq senım keŋesınıŋ jūmysyna berılgen baǧa dep esepteimın», - dedı QR Prezidentınıŋ kömekşısı Erlan Qarin marapattau räsımınde. Onyŋ aituynşa, Ūlttyq senım keŋesı qūrylǧaly 2,5 jyl ışınde elımızde 90-ǧa juyq qūqyqtyq-normativtık aktı qabyldandy. «Är qūjattyŋ artynda, qazaqstandyqtardyŋ müddesı qarastyrylǧan. Jäne atalǧan qūjattar qoǧamdaǧy naqty bır mäselenı şeşuge baǧyttalǧan. Memleket basşysy Ūlttyq senım keŋesınıŋ 15-ke juyq belsendı müşesın türlı memlekettık nagradalarmen marapattap otyr. Būl keŋes müşelerıne qoǧamdaǧy türlı mäselelerdıŋ şeşımın tabuyna qosqan ülesterı üşın berılıp otyrǧan nagrada. Aldaǧy uaqytta da bırlese otyryp jūmys ısteitınımızge senımdımın», - deidı ol.Sonymen Memleket basşysynyŋ Jarlyǧymen Parlament Mäjılısınıŋ deputaty Baqytbek Smaǧūl «Parasat» ordenımen nagradtaldy. Sondai-aq, «Qūrmet» ordenımen marapattalǧandar qatarynda Mūrat Äbenov, Saiasat Nūrbek, Tättıgül Talaeva men Qanat Sahariianov boldy. Odan bölek, Ashat Sadyrbai men Uais Ersaiynūlyna, Arman Qaşqynbekov pen Örken Kenjebekke «Eren eŋbegı üşın» medalı, al Aleksandr Danilov pen Qaisar Tūrsynqojaǧa «Şapaǧat» medalı tabystaldy. Börıhan Nūrmūhamedov jäne Maksim Rojin QR Prezidentınıŋ alǧys hatymen marapattaldy.
