Qazaq qoǵamynda jas jetkinshekterdtiń ómirlik jolyn tańdaýyna, qara tanyǵannan rýhanı nár alyp, unamdy qasıetterdi óń boıyna jınaqtaýyna ata-ananyń tıgizetin áseri mol. Óıtkeni bala ómirge ata-anasynyń kózqarasymen qaraıdy. Óse kele balanyń tanym kókjıegi keńeıip, aınaladaǵy qubylystarǵa ózindik pikir qalyptastyra bastaıdy. Bala armandaýdy úırenip, jelden júırik, taýdan alyp bolýǵa talpynady.
Mine, osy tusta ata-analarymyz túrli qıynshylyqtarǵa tap bolatyny belgili. Biri balasyn ıntellektýaldyq ortalyqtarǵa berse, al biri balasyn áleýeti jetpeıtin úıirmelerge jetekteıtini ras. Biraq «jas aǵashty qalaı ıseń, solaı ósedi» degen támsildi jadymyzdan shyǵarmaǵanymyz jón. Al sportqa áýes balanyń betin qaqpaı, tańdaǵan sport túrine jol silteý – ata-ananyń paryzy. Sebebi salaýatty urpaq – salamatty eldiń kepili.
Osy oraıda balasyn «Astana Qazaqstan Team» velokomandasynyń jetkinshekter úıirmesine berip, áýel bastan velosportqa baýlyǵan Gúldana Sársenqyzy balasynyń ózi qalaǵan sport túrine barǵanyna óte qýanyshty.
«Meniń ulym Ahmetov Mansur 12 jasta, velosportpen aınalysady. Balam jattyǵýlaryn «Saryarqa» velotreginde ótkizedi jáne óz jattyqtyrýshylaryn qatty jaqsy kóredi. Aýa raıy qandaı bolmasyn jattyǵýyna barýǵa asyǵady. Eger jattyǵýda jańa bir nárse úırense, ol týraly qýana aıtyp keledi. Ol osyǵan deıin birneshe jarystarǵa qatysty, nátıjeleri jaman emes, jattyqtyrýshylary nátıjelerine dán rıza», – dedi Mansurdyń anasy.
Sonymen birge Aınur Ǵabdýllaqyzy da uly Karımjannyń jetken jetistikteri úshin «Astana Qazaqstan Team» velokomandasynyń jetkinshekter úıirmesine alǵysyn bildiredi.
«Árıne, «Astana Qazaqstan Team» úıirmesine kóńilimiz tolady. Ásirese, jattyqtyrýshymyz Amılııa Bolatqyzyna alǵysymyz sheksiz. Toptaǵy eń kishi bala bolsa da, jattyqtyrýshylar bizge senim artýda. Biz de senimderinen shyǵýǵa tyrysýdamyz», – dedi ol.
Al balasynyń shymyrlyǵyna súısingen Kasymova Almıra hanym bolsa, jattyqtyrýshylar quramynyń sheberligin tilge tıek etti.
«Balam 2 jastan bastap jarystarǵa qatysyp keledi. Bapkerlerine balamyzdyń fızıkalyq damýyna qosqan úlesteri men sporttyq maqsattarǵa qol jetkizýdegi tabandylyqtary úshin alǵys aıtamyn. Sizderdiń pedagogıkalyq sheberlikterińizdiń arqasynda bizdiń jas chempıondarymyz úlken yqylaspen árbir jattyǵýǵa barýǵa asyǵady jáne kelesisin taǵatsyzdana kútedi», – dedi Alannyń anasy.
«Úlgi bolar aǵanyń izin bas ta, jolyn qý» degen. Jas jetkinshekterimizge Aleksandr Vınokýrov syndy aǵalarynyń jolyn bersin deımiz!
«Astana» kásibı sport klýbynyń bas seriktesi – «Samuryq-Qazyna» UÁQ» AQ, quryltaıshysy – Týrızm ındýstrııasy men sportty qoldaý qory.
Oralbaı MERGENBAIULY
