QR Premer-Ministrı Älihan Smaiylov ministrlerge bırqatar mındet jüktedı, dep habarlaidy «Adyrna» tılşısı.
Atap aitsaq, Ūlttyq ekonomika ministrlıgıne memlekettık organdarmen jäne ūiymdarmen bırlesıp, biylǧy jyldyŋ 20 qaŋtaryna deiın Ükımettıŋ 2022 jylǧa arnalǧan ıs-qimyl baǧdarlamasynyŋ jobasyn äzırleudı, qysqa merzım ışınde ŞOB-qa memlekettık qoldau şaralaryn ūsynudyŋ aşyq ärı tüsınıktı tetıkterın äzırleudı jäne damu instituttary (QDB, «Damu» qory jäne t. b.) jūmysynyŋ tiımdılıgıne taldau jürgızudı tapsyrdy.
Ükımet basşysy Ūlttyq ekonomika ministrlıgıne Ūlttyq bankpen jäne «Atameken» ŪKP-men bırlesıp İnfliasiiaǧa qarsy äreket etu şaralarynyŋ keşenın özektendırudı, bır közden alu täsılımen memlekettık satyp alu ülesın qysqartu tūrǧysynan «Samūryq-Qazyna» AQ satyp alu tärtıbın tübegeilı qaita qaraudy, «Samūryq-Qazyna» AQ men onyŋ enşıles kompaniialarynyŋ satyp aludy jüzege asyrudyŋ bükıl prosesın qaita qaraudy tapsyrdy.
Ūlttyq ekonomika ministrlıgıne Bäsekelestıktı qorǧau jäne damytu agenttıgımen, Qarjy, Ädılet ministrlıkterımen jäne «Atameken» ŪKP-men bırlesıp, biylǧy jyldyŋ 1 aqpanyna deiın bäsekeles ortaǧa beruge jatatyn aktivterdı ırıkteu täsılderın äzırleu, Ükımet qaulysynyŋ tiıstı jobasyn äzırleu jäne engızu tapsyryldy.
Ortalyq pen öŋırler arasyndaǧy biudjetaralyq özara qarym-qatynastardyŋ aiqyn qaǧidalaryn qalyptastyru maqsatynda Premer-Ministr biudjet zaŋnamasyna tüzetuler toptamasyn daiyndaudy jäne jalpy sipattaǧy transfertterdı esepteu ädıstemesın jetıldırudı tapsyrdy.
Ūlttyq ekonomika ministrlıgıne müddelı memlekettık organdarmen, batys jäne oŋtüstık öŋırlerdıŋ – Aqtöbe, Almaty, Atyrau, Batys Qazaqstan, Jambyl, Qyzylorda, Maŋǧystau jäne Türkıstan oblystarynyŋ äkımdıkterımen bırlesıp, «Auyl – El besıgı» baǧdarlamasy jäne basqa da salalyq baǧdarlamalar aiasynda jekelegen baǧyttar äzırleu tapsyryldy.
Nūr-Sūltan qalasynyŋ äkımdıgıne İndustriia jäne infraqūrylymdyq damu ministrlıgımen bırlesıp, LRT jobasyn odan ärı paidalanu nūsqalary boiynşa naqty ūsynystar engızu tapsyryldy.
Ükımet basşysy utilizasiialyq alym mäselesın ıske asyrudyŋ naqty tetıkterı bar ūsynystar daiyndaudy, mūnai önımderı naryǧyn retteu jönınde şaralar keşenın äzırleudı, bır apta merzımde tiıstı esepter jürgızudı jäne benzin öndıruşıler men deldaldar üşın aksizder boiynşa kelısılgen ūsynystar engızudı tapsyrdy.
Ä. Smaiylov IIM men TJM qūqyq qorǧau jüiesın reformalau jönındegı jūmysty jalǧastyruy qajet ekenın atap öttı. IIM-ge Ūlttyq ekonomika jäne Qarjy ministrlıkterımen bırlesıp, bır apta ışınde Ükımetke IIM arnauly maqsattaǧy bölımşelerı men Ūlttyq ūlandy sandyq ärı sapalyq nyǧaitu jönınde ūsynystar engızu tapsyryldy.
Ükımet basşysy poliseilerdıŋ qūqyqtyq qorǧaluyn arttyru mäselelerın pysyqtaudy, qaru ainalymy men dıni ekstremizmnıŋ taraluyna baqylaudy küşeitudı, bır apta ışınde Ükımetke azamattyq qorǧau organdaryn materialdyq-tehnikalyq jäne äleumettık nyǧaitu jönınde ūsynystar engızudı, eldıŋ azamattyq qorǧanys josparyna qajettı tüzetuler engızudı, tötenşe jaǧdai kezeŋınde memlekettık materialdyq rezervten materialdyq qūndylyqtardy şyǧarudy jetıldıru jönınde kelısılgen ūsynystar äzırleudı tapsyrdy.
Qorǧanys ministrlıgıne Ūlttyq ekonomika, İndustriia jäne infraqūrylymdyq damu, Qarjy ministrlıkterımen bırlesıp, arnaiy bölımşelerdıŋ äskeri qyzmetşılerınıŋ tabysyn arttyru, äskeri-kölık aviasiiasymen, qaru-jaraqpen jäne äskeri tehnikamen jaraqtandyru mäselelerın pysyqtau tapsyryldy.
Premer-Ministr Qaruly Küşter men barlau qūrylymdaryn reformalau, äskerdıŋ qorǧanys qabıletın tübegeilı arttyru jönınde ūsynystar äzırleudı jäne Qauıpsızdık Keŋesı Apparatynyŋ jaqyn aradaǧy otyrysyna engızudı tapsyrdy.
Ükımet basşysy jūmysqa ornalasuǧa jäne äleumettık qoldauǧa mūqtaj azamattardyŋ naqty sanyn anyqtap, äleumettık-eŋbek salasyn sapaly jaŋartu boiynşa jūmys jürgızu qajet ekenın atap öttı. Ä. Smaiylov biznes ideialardy ıske asyruǧa arnalǧan granttar (400 AEK deiın) men eŋbekaqy mölşerın ūlǧaitu, jastar praktikasyna, «Alǧaşqy jūmys orny» jobasyna qatysu merzımın arttyru boiynşa şaralar qabyldaudy tapsyrdy.
Ūlttyq ekonomika, Eŋbek jäne halyqty äleumettık qorǧau ministrlıkterıne bır ai merzımde halyqtyŋ tabysyn arttyru jönındegı baǧdarlamanyŋ jobasyn äzırleu tapsyryldy. Bılım jäne ǧylym ministrlıgıne müddelı memlekettık organdarmen bırlesıp, mūǧalımder tapşylyǧy bar öŋırler üşın äleumettık qoldau şaralarynyŋ tiıstı paketımen pedagogtardy tartu baǧdarlamasyn äzırleu, bedeldı şeteldık joǧary oqu oryndarynyŋ 5 filialyn aşu jönınde şaralar qabyldau tapsyryldy.
Premer-Ministr memlekettık bılım beru tapsyrysy jobasynda tehnikalyq baǧyttar boiynşa, bırınşı kezekte, batys öŋırlerde granttar sanyn ūlǧaitu, halyq tyǧyz qonystanǧan öŋır jastarynyŋ joǧary oqu oryndarynda bılım aluy üşın nysanaly granttar közdeu qajettıgın atap öttı.
«Adyrna» ūlttyq portaly
