"Integrity Astana" kommerııalyq emes uıymynyń jetekshisi Janat Nurǵalıev óz mindetin atqara almaı otyrǵan, laýazymyn bosatýy tıis úsh ákimdi atady. Olar — Shyǵys Qazaqstan oblysynyń ákimi Danıal Ahmetov, Jambyl oblysynyń ákimi Berdibek Saparbaev jáne Nur-Sultan qalasynyń ákimi Altaı Kólginov dep habarlaıdy "Adyrna" ulttyq portaly "ulysmedia.kz" saıtyna silteme jasap.
"Máselen, Danıal Ahmetov aımaqty damytýǵa eshqandaı kóńil bólgen emes. Óńirdegi azamattyq qoǵamdy damytýǵa múmkindik bolmaı jatyr. "Qashan Ahmetov ketedi?" dep jurt eleńdep kútip otyr. Jemqorlyq kún saıyn dendep barady", – degen ol zeınet jasyndaǵy basshylar oryndaryn bosatýy tıis ekendigin, erik-jigeri bar jastarǵa barynsha jol ashý kerektigin alǵa tartty.
Onyń aıtýynsha, zeınet jasyndaǵy Berdibek Saparbaev ta aımaqqa kóńil bólmeıtinderdiń biri. Jalpy, Jambyl oblysy ǵana emes elimizdiń barlyq óńirinde memlekettik satyp alý boıynsha kóptegen kemshilikter bar. Táýelsiz zertteýshi áleýmettik salany qarjylandyrýda tepe-teńdiktiń saqtalmaýyna qatysty jemqorlyq qaýpi bar birneshe keısterdi anyqtaǵan.
"Mysaly, Nur-sultan ákimdigi at sporty keshenin jeke qurylys salýshydan satyp alý úshin bıýdjetten 6 mıllıard 243 mıllıon teńge bólip otyr. Bıyl densaýlyq saqtaý salasyndaǵy qurlystarǵa múlde qarjy qarastyrylmaǵan, turǵyn úı-kommýnaldyq sharýashylyǵy sııaqty paıda kórýge bolatyn salalarǵa basymdyq berilgen. Al ashyqtyǵy kórinip turatyn bilim, densaýlyq saqtaý salasy nazardan shet qalǵan. Sondyqtan jemqorlyq qaýpi baıqalady. Kólginov arnaıy toptyń qyzyǵýshylyǵy úshin ǵana jumys isteıdi, qoǵamdyq pikirge qulaq asqan emes. Qoǵamdyq oryndarda úlken qurlystardyń júrip jatqanyna ózimiz kýámiz. Joǵaryda aıtqanymdaı burynnan istep kele jatqan jasy úlken zeınetkerlerge demalys kerek", – dep túıindedi ol.
Al ekonomıst Aıdar Álibaevtiń reıtıngi boıynsha óńir basshylarynyń arasynda eshqaısysy oblysty damyta almaı otyr. Ol onyń birden bir sebebi retinde ákimderdiń halyq múddesinen góri, jeke bıznes qyzyǵýshylyǵy úshin jumys isteýge beıildi ekenin atady.
"Bir de bir ákim óziniń oblysyn damyta alyp otyrǵan joq. Turǵyndar úshin ekonomıkalyq ahýaldy jaqsartýǵa múddeli emes. Jalpy alǵanda ákimder óz qyzyǵýshylyqtary úshin ǵana jumys istep keledi, ózderin jarnamalaıdy. Bızneste otyrǵan týǵan-týystary úshin túsiniksiz baǵdarlamalardy shyǵarady", – deıdi sarapshy.
Sondaı-aq, onyń aıtýynsha jappaı ereýilden sońǵy Úkimettegi aýys-túıis halyqqa tańdaý jasaý quqyǵyn berýdi kózdeıtin mańyzdy betburys dep aıtýǵa erte. Al keshegi jaǵdaıdan soń bıliktiń qazirgi mindeti – eldegi jaǵdaıdy qalaı da qalpyna keltirý. Sondyqtan olar kez-kelgen ýáde berýge daıyn. Al Almatyny belgisiz arandatýshylar qıratyp, órtke orap jatqan kezde qala basshysy retinde bir aýyz ún qatpaı joǵalyp ketip, artynan tabylǵan Baqytjan Saǵyntaev ta reıtıngi tómen ákimderdiń qatarynda.
"Almaty ákimi bolsa almatylyqtardy ábden tyǵyryqqa tirep boldy. Bos oryn kórinse boldy 9 qabatty úı salady. Ómir súrý múmkin bolmaı barady. Ár oblys boıynsha osyndaı mysaldardy kóptep keltire berýge bolady. Bos jeri kóp Qostanaı, Pavlodar, soltústik óńirlerdiń ákimderi de dál osylaı týǵan-týystarynyń bıznesin damytýǵa jumys istep otyr. Sondyqtan halyq múddesi úshin jumys istep otyr dep bir ákimdi de aıta almaımyn. Qazirgi premer-mınıstrdiń ornyna kelgen Álıhan Smaılovtyń da Mamınnen ozyp turǵan eshteńesi joq. Al halyqqa oblys ákimderin ózderi saılaý degen múmkindikti ázirge bermeıdi, bálkim alda bolatyn shyǵar. Olar úshin munyń saldary óte jaman. Eger qandaı da bir jaqsy ákim kelse Prezıdentke basqarý qıynǵa túspeı me, oǵan munyń ne keregi bar", – dedi sarapshy.
