Қырғызстанда «Азаттық» радиосының сайты бұғатталып , оппозиция өкілдері қамауға алынды, деп хабарлайды “Адырна” ұлттық порталы ВВС басылымына сілтеп.
Оған себеп – Қырғызстан мен оның көршілері арасындағы шешілмеген аумақтық даулар, олардың жариялануы, сыны мен наразылығы екен.
Қырғызстанның Мәдениет, ақпарат, спорт және жастар саясаты министрлігі «Азаттық-Еуропа» радиосының қырғызша сайты Азаттык-Медианы «Қырғызстанның ұлттық мүдделеріне қайшы келетін материалдар бар» деген негізбен екі айға бұғаттау туралы шешім қабылдады.
Министрліктің Ақпараттық саясат басқармасының басшысы Салқын Сарногоеваның айтуынша, министрлік «Қырғызстан мен Тәжікстан шекарасындағы ауыр шайқас» сюжетінде жалған ақпарат бар деп Азаттық-медиаға хат жолдаған. Жауап ретінде, редакторлар оны алып тастайтындарын айтқан, бірақ ешқашан өшірмеген.
«Азат Еуропа/Азаттық» радиосының президенті Джейми Флай даулы материалдың барлық халықаралық журналистика стандарттарына сай келетіні туралы мәлімдеме жасап, бұғаттауға жауап берді.
«Журналистерге қарсы қоқан-лоққылар мен тәуелсіз БАҚ-тың аузын жабу әрекеті – Қырғызстандағы демократияға нұқсан келтіретін авторитарлық тактика», - деді Флай.
Human Rights Watch халықаралық ұйымы Қырғыз билігінің Азаттық-Медиа сайтына тосқауыл қоюын сынады. Ұйымның Орталық Азиядағы зерттеушісі Сыйнат Сұлтаналиева Қырғызстан тәуелсіз БАҚ-ты қыспастан, қолдауы керек екенін атап өтті.
"Қақтығыстың екі жағына да дауыс беру - стандартты журналистік тәжірибе. Осы негізде Азаттықты бұғаттау Қырғызстандағы цензураның және еркін журналистикаға бақылаудың күшейгенінің белгісі", - деді ол.
Азаттықпен ынтымақтастығын АҚШ Мемлекеттік департаменті, ЕО өкілдігі және Internews халықаралық журналистік ұйымы білдірді. Соңғы уақытқа дейін Қырғызстан сөз бостандығы рейтингі бойынша Орталық Азиядағы ең жоғары орынға ие болды және пікір плюрализмімен ерекшеленді.
2022 жылы Қырғызстан сөз бостандығы бойынша әлемдік рейтингте жеті сатыға көтеріліп, 72-орынға ие болды. Салыстыру үшін Қазақстан 122, ал Ресей 155-орынға тұрақтады.
Айта кетейік, 28 қазан күні таңертең Қырғызстанның тәуелсіз бұқаралық ақпарат құралдары Азаттықпен ынтымақтаса отырып, бірлескен акция өткізді: жергілікті уақыт бойынша сағат 9.00-ден 12.00-ге дейін олар жаңалықтар жарияламады. Ал мемлекеттік органдардың жаңалықтары күні бойы жарияланбады.
Сондай-ақ, сайт жабылар алдында Ош облысындағы Кемпір-Абад су қоймасын Өзбекстанмен басқа даулы аймақтарға айырбастау туралы үкіметтің шешімін сынаған 20-дан астам оппозиционер мен белсенді ұсталды.
Сот "жаппай тәртіпсіздіктер ұйымдастыруға дайындалды" деген айыппен ұсталғандардың көпшілігі екі айға қамауға алынады деп шешті. Жалғыз ерекшелік белсенді Талант Ешалиев болды, ол денсаулығына байланысты үйқамаққа алынды. Айыпталушылар өз кінәларын мойындамай, тергеу барысында оларға жасалған қысым туралы айтып отыр.
