Американың Өкілдер палатасы Сыртқы істер комитетінің мүшелері Ресей президенті Владимир Путинді Украинада геноцид жасап жатыр деп мәлімдеді. Бұл мәлімдемелер олардың Халықаралық қылмыстық соттың бас прокурорымен кездесуінен бір күн бұрын айтылды, деп хабарлайды “Адырна” ұлттық порталы.
Наурызда ХҚК Путинді Украинадан балаларды ұрлап әкеткені үшін жеке жауапты деп айыптап, әскери қылмыстары үшін халықаралық қамауға алу туралы ордер берді.
Алайда әзірге сот оны 18 ай бұрын Украинаға басып кіргені және басқа қылмыстары үшін айыптаған жоқ.
Комитет төрағасы, республикашыл конгрессмен Майкл Макколл Гаагаға сапары кезінде журналистерге Путиннің «мәдениетті, халықты және дінді жер бетінен жоюға тырысып жатқанын және бұл геноцидтің анықтамасы» екенін айтты.
Комитеттің тағы бір мүшесі, республикашыл Энн Вагнер онымен келісіп, «бұл адам жасаған адамзатқа қарсы қылмыстар мен ашық геноцид» деді.
Демократ Джерри Коннолли Путин соғысқа дейін де Украинаның ел және халық ретінде бар екенін жоққа шығарғанын айтты.
Сондықтан ол геноцидті ақтайтын дәлелдер келтірді, - деді Коннолли.
Депутаттардың бұл мәлімдемесі Ресейдің Украинаның шығысындағы базарды атқылауынан, кемінде 16 адам қаза тауып, тағы да көп адам жарақат алған кезде айтылды. Снаряд АҚШ-тың мемлекеттік хатшысы Энтони Блинкен Киевте болған кезде болған.
