Қазақстан Ұлттық қауіпсіздік комитеті төрағасының орынбасары Руслан Сейсембаев биылғы жылы еліміздің аумағында жасалған лаңкестік әрекеттерге тоқталып өтті, деп хабарлайды “Адырна” ұлттық порталы ҚазАқпаратқа сілтеме жасап.
- Осы кезеңде терроризм қаупінің күшеюі тікелей Қазақстанда тұрақты болып отыр. Жыл сайын кем дегенде екі лаңкестік әрекеттің алды алынады, - деді Руслан Сейсембаев Шанхай ынтымақтастық ұйымының аймақтық антитеррорлық құрылымы (ШЫҰ АТҚ ) кеңесінің 40-шы отырысында.
Сондай-ақ, ол өткен бірнеше оқиғаға мысал келтірді.
- Тек биыл ғана дайындықтың бастапқы кезеңінде Түркістандағы Қожа Ахмет Ясcауи кесенесіне қолдан жасалған жарылғыш затты жару әрекетінің, сондай-ақ Астанадағы адам көп жиналатын жерлерде қарулы шабуылдың жолы кесілді. Бізге келіп түскен ақпарат ШЫҰ-ға мүше мемлекеттерге террористік қауіптердің қалыптасуы бірқатар басым факторлардың әсерінен орын алады деген қорытынды жасауға мүмкіндік береді, - деді Ұлттық қауіпсіздік комитетінің өкілі.
Айта кетейік, отырысқа Қазақстан Ұлттық қауіпсіздік комитетінің төрағасы Ермек Сағымбаев та қатысты.