Almaty qalasynyń Boraldaı kóshesinde aýyr júk kóligi 2017 jyly týǵan balany qaǵyp ketip, oqıǵa ornynda mert boldy, dep habarlaıdy “Adyrna” ulttyq portaly.
2 sáýirde bolǵan qaıǵyly jaǵdaı kezinde Belarýs azamaty júk kóliginin basqarǵan. Vıdeojazbada balanyń anasy jol jıeginde kútip turǵany, al balanyń joldan ótpek bolǵany kórinedi.
Sol sátte jolaýshylar avtobýsy balanyń aldyn kesip ótken. Ony aınalyp ótpek bolǵan bala júk kóliginiń astyna túsken. Oqıǵa anasynyń kóz aldynda boldy.
Bul jaǵdaı qoǵamda úlken rezonans týdyryp, áleýmettik jeli qoldanýshylary túrli pikir bildirýde. Biri qala ishinde aýyr júk kólikteriniń qozǵalysyna tyıym salýdy talap etse, endi biri jol erejesin saqtamaǵan avtobýsty kinálap otyr. Sonymen qatar, keıbiri ananyń balany ózi jetektep ótpegenine ókinetinin aıtýda.
Polıııa departamentiniń málimetinshe, jol-kólik oqıǵasy Alataý aýdany, Boraldaı men Navoı kósheleriniń qıylysynda saǵat 12:17-de tirkelgen. Marqum bolǵan bala jaıaý júrginshiler jolaǵymen ótip bara jatqan, alaıda júk kóligi ýaqytynda toqtaı almaı, ony qaǵyp ketken.
Qazirgi tańda quqyq qorǵaý organdary oqıǵanyń mán-jaıyn anyqtaýda.
