Qyrǧyzstannyŋ Ūlttyq qauıpsızdık memlekettık komitetı (ŪQMK) Qazaqstandyq käsıpker Erqanat Jūmabekovke halyqaralyq ızdeu jariialady. Būl turaly Qyrǧyzstannyŋ arnaiy qyzmetı resmi baspasöz habarlamasynda mälımdedı, dep habarlaidy “Adyrna”.
Erqanat Jūmabekovk— Almaty oblysynyŋ būrynǧy äkımı Amandyq Batalovtyŋ küieu balasy.
ŪQMK mälımetınşe, Jūmabekov ūiymdasqan qylmystyq topty (OQT) qarjylandyrdy degen küdıkke ılıngen. Atalǧan topty 2023 jyldyŋ qazanynda Bışkekte arnaiy operasiia kezınde öltırılgen qylmys älemınıŋ serkesı — Kamchybek (Kamchy) Kölbaev basqarǧan.
«Jūmabekov K.Asanbektıŋ (Kölbaevtyŋ) qylmystyq äreketın bıle tūra, TMD elderınde öz biznes jobalaryn ılgerıletu maqsatynda onyŋ ainalasyn jüielı türde qarjylandyryp otyrǧan», — delıngen Qyrǧyzstan ŪQMK mälımdemesınde.
ŪQMK derekterıne süiensek, Erqanat Jūmabekov Kölbaevtyŋ «Bratskii krug» atty qylmystyq qūrylymyna qoldau körsetıp, onyŋ tuystarynyŋ Almatyǧa jasaǧan saparlaryn qarjylandyrǧan. Sondai-aq, qylmystyq top müşelerımen Ystyqköldegı «Bars» demalys ornynda bırneşe ret kezdesken.
Bışkek qalasynyŋ Oktiabr audandyq soty Jūmabekovke qatysty syrttai qamauǧa alu türındegı būltartpau şarasyn bekıttı. Oǧan Qyrǧyzstan aumaǧynda resmi türde ızdeuge jariialandy jäne jaqyn arada İnterpol bazasyna engızıluı mümkın.
Aita ketsek, Erqanat Jūmabekov — tek käsıpker ǧana emes, öŋırlık saiasi elitaǧa qatysy bar tūlǧa. Ol 2014–2021 jyldar aralyǧynda Almaty oblysyn basqarǧan, saiasi salmaǧy bar Amandyq Batalovtyŋ küieu balasy.
Batalovtar äuletı oŋtüstık öŋırlerde ūzaq jyldar boiy yqpalyn saqtap kelgen. Al Erqanat Jūmabekov aşyq derekközderde Almaty men oblystaǧy qūrylys jäne developerlık kompaniialarmen bailanysty tūlǧa retınde körsetıledı.
Ūqsas jaŋalyqtar
Qyrǧyzstanda 20 jasqa tolmaǧan qyzdarǧa küieusız nemese ata-anasyz elden şyǧuǧa tyiym salu ūsynylady
