“Qazgıdromet” Almaty men elimizdiń birneshe qalasynda qolaısyz meteorologııalyq jaǵdaılarǵa baılanysty aýa sapasynyń nasharlaıtynyn eskertti, dep habarlaıdy “Adyrna” ulttyq portaly.
Resmı málimetke sáıkes, 10 sáýir kúni Pavlodar, Qaraǵandy, Jezqazǵan, Balqash, Temirtaý, Óskemen jáne Almaty qalalarynda aýa quramynyń lastanýyna yqpal etetin meteojaǵdaı qalyptasýy múmkin.
“Qolaısyz meteorologııalyq jaǵdaılar – bul atmosferada jeldiń báseńdeýi, tuman, ınversııa syndy tabıǵı qubylystardyń jıyntyǵy. Olar zııandy zattardyń jer betine jaqyn qabatta shoǵyrlanýyna yqpal etedi”, – delingen habarlamada.
Almaty qalasynda 10 sáýir kúni aýyspaly bultty, jaýyn-shashynsyz aýa raıy kútiledi. Jel – ońtústik-batystan, jyldamdyǵy 4–9 m/s.
Túngi temperatýra +10…+12°C bolsa, kúndiz +20…+22°C kórsetedi.
Mamandar turǵyndarǵa múmkindiginshe ashyq aýada uzaq bolmaýǵa, qorǵanysh quraldaryn qoldanýǵa jáne densaýlyqqa muqııat bolýǵa keńes beredi.
