Irannyń ońtústiginde, Parsy shyǵanaǵy jaǵalaýyndaǵy Bender-Abbas portyndaǵy joıqyn jarylystan qaza tapqandar sany 40 adamǵa jetti, dep habarlaıdy "Adyrna" ulttyq portaly The New York Times basylymyna silteme jasap.
Bender-Abbas qalasynda halyqtyń densaýlyǵyna tóngen eleýli qaýipke baılanysty tótenshe jaǵdaı jarııalandy. Bılik 20 shaqyrym radıýsta zııandy zattardyń taralýynan qaýiptenýde.
Túni boıy Shahıd Radjaı portynda konteınerlerdiń birinde saqtalǵan hımıkattardyń órtenýinen shyqqan órtti sóndirýge áreket jasaldy. Basylymnyń jazýynsha, konteınerde zymyrandarǵa arnalǵan qatty otynnyń negizgi quramdas bóligi sanalatyn natrıı perhloratyn jarylǵan.
Oqıǵa AQSh pen Iran arasyndaǵy ıadrolyq baǵdarlama boıynsha úshinshi kelissózder kezeńiniń ótip jatqan kúni boldy. Jergilikti bılik bul oqıǵany dıversııa nemese ádeıi jasalǵan shabýyl dep sanamaıdy.
Alǵashynda portta janarmaı qoımasy jaryldy degen boljam aıtylǵan edi. Alaıda Irannyń Ulttyq munaı óńdeý jáne taratý kompanııasy bul aqparatty joqqa shyǵardy.
Iran Ishki ister mınıstrliginiń sońǵy málimetteri boıynsha, jarylys saldarynan 40 adam qaza taýyp, 1200-den astam adam jaraqat alǵan.
Zardap shekkender arasynda qazaqstandyqtar bar-joǵy ázirge habarlanǵan joq.
Qazirgi tańda qaıǵyly oqıǵa boıynsha tergeý bastaldy. Iran úkimeti Shahıd Radjaı portynda bolǵan jarylystan qaza tapqandarǵa baılanysty 28 sáýir, dúısenbi kúnin jalpyulttyq aza tutý kúni dep jarııalady.
