شىمكەنت قالاسىنىڭ اكىمى مۇرات ايتەنوۆ ورتالىق كوممۋنيكاتسيالار قىزمەتىنىڭ بريفينگىندە قالانىڭ تاۋەلسىزدىك جىلدارىنداعى جەتىستىكتەرىن جان-جاقتى بايانداپ بەردى.
"ۇلت كوشباسشىسى نۇرسۇلتان نازارباەۆتىڭ باسشىلىعىمەن قازاقستان تاۋەلسىزدىك جىلدارىندا زور تابىستارعا قول جەتكىزدى. سونىڭ ىشىندە شىمكەنت قارقىندى دامۋ جولىنا ءتۇستى. سوڭعى 30 جىلدا قالا حالقىنىڭ سانى 400 مىڭنان ءبىر ميلليوننان استام ادامعا دەيىن ءوستى. 1991 جىلى قالادا بارلىعى 72 مەكتەپ بولدى، بۇگىنگى كۇنى ولاردىڭ سانى 202-گە جەتتى. تاۋەلسىزدىك تاڭىندا وقۋشىلار سانى 68 مىڭ بولدى، قازىر قالالىق مەكتەپتەردە 250 مىڭنان استام بالا وقيدى. مادەنيەت وبەكتىلەرىنىڭ سانى 52-دەن 120-عا دەيىن، ال سپورت وبەكتىلەرى 337 – دەن 900-گە دەيىن ۇلعايدى. 90-شى جىلدارى قالادا 27 دەنساۋلىق ساقتاۋ نىسانى بولعان، قازىرگى ۋاقىتتا ولاردىڭ سانى 110-عا جەتتى. شىمكەنت تۇرعىندارىنىڭ ورتاشا ءومىر ءسۇرۋ ۇزاقتىعى 63,9 جاستان 71 جاسقا دەيىن ۇلعايدى", - دەدى م.ايتەنوۆ.
كورسەتىلگەن كەزەڭدە قالانىڭ ونەركاسىپ ءونىمىنىڭ كولەمى 10 ملرد.تەڭگەدەن 670 ملرد. تەڭگەگە دەيىن ۇلعايدى. قالا بيۋدجەتى تيىسىنشە 1 ملرد. تەڭگەدەن 497 ملرد. تەڭگەگە دەيىن ءوستى.
شىمكەنت قالاسى اكىمدىگىنىڭ ءباسپاسوز قىزمەتى
