نۇر-سۇلتان قالاسىنىڭ تۇرعىنى 2 جاسار قىزىنىڭ بالاباقشاعا بارىپ، سوققىعا جىعىلعانىن مالىمدەگەن. تۇرعىننىڭ سوزىنشە، قىزىن تاربيەشى ۇرعان. ونى اتا-انا بەينە باقىلاۋ كامەراسىنان كورىپتى، دەپ حابارلايدى “ادىرنا” ۇلتتىق پورتالى استانا ارناسىنا سىلتەمە جاساپ.
نۇر-سۇلتان قالاسىنىڭ تۇرعىنى مارينا اۋشەنوۆا الى ەكىگە دە تولماعان قىزىن جەكەمەنشىك بالاباقشادا تاربيەشىلەردىڭ اياۋسىز ۇرعانىن ايتادى. ادەتتەگىدەي بالاسىن باقشاعا اپارعان ول كەشكە ۇيگە كەلگەندە "قىزىمنىڭ تۇرىن كورىپ شوشىپ كەتتىم" دەيدى.
"مەنىڭ قىزىم كىشكەنتاي، ەكىگە دە تولماعان. سويلەي دە المايدى. سول كۇنى بالاباقشادان كەشكىسىن الىپ قايتتىق، ۇيگە كەلىپ شەشىندىرىپ جاتساق، قولىنىڭ بارلىعى كوگەرگەن. ەڭ قورقىنىشتىسى مويىنى بولاتىن", - دەيدى بالانىڭ اناسى مارينا اۋشەنوۆا.
مارينا قۇزىرلى ورىندارعا شاعىمدانعان. قورعاۋشىنىڭ ايتۋىنشا، ءىس قارقىندى ءجۇرىپ جاتقان جوق. قولدارىندا دالەل رەتىندە بەينەكامەرا جازباسى بولسا دا، ءجىپسىز بايلانىپ وتىرعانىن ايتادى.
"سوت الدى قاعاز جازدىرىپ الدى. سوتقا دەيىن ەشقانداي اقپارات تاراتپاۋ تۋرالى. سوندىقتان تولىق مالىمەت بەرە الماي وتىرمىز. بىراق ىس ءالى توقتاپ تۇر. ال ءبىز ول ۆيدەونى جاريالاساق، بىزگە قاتىستى قىلمىستىق ءىس قوزعالادى", - دەيدى قورعاۋشى ينارا جاباعىباەۆا.
بۇل جاعداي وزگە اتا-انالاردى دا الاڭداتىپ وتىر. ايتۋلارىنشا، بۇعان دەيىن بالاباقشادا وسىنداي وقيعا بولعان. يرينا نۋرالينانىڭ بالاسىنىڭ بىرنەشە رەت ەرىنى جىرىلىپ كەلگەن. وعان اسا ءمان بەرمەگەن كورىنەدى. يرينانىڭ سوزىنشە، بۇل جاعدايدان كەيىن ۇلىن بالاباقشادان شىعارىپ العان.
"مەن بۇل جاعدايدى ەستىگەندە ارىز جازىپ بالالارىمدى شىعارىپ الدىم. مارينانىڭ قىزىنىڭ فوتوسۋرەتتەرى مەن ۆيدەولارىن كورىپ، ۇندەمەي وتىرا المادىم. سول كۇنى بارلىق اتا-انانى جيناپ، اكت زالىندا جينالىس جاسادىق. تاربيەشى ول كەزدە ءالى جۇمىس ىستەيتىن، سول كەزدە اتا-انالاردان كەشىرىم سۇرادى", - دەپ مالىمدەدى اتا-انالاردىڭ ءبىرى يرينا نۋرالينا.
ال مەكتەپكە دەيىنگى تاربيە ورنىنىڭ ديرەكتورىنىڭ ايتۋىنشا، تاربيەشىگە قاتاڭ سوگىس بەرىلگەن. ونان كەيىن جۇمىستان قۋىلىپتى.
"بولعان وقيعاعا بايلانىستى تاربيەشىدەن تۇسىنىكتىمە الىنىپ، حاتتاما تولتىرىلدى. تاربيەشى قازىرگى كەزدە 52-باپ، 4-تارماعى بويىنشا جۇمىستان قۋىلدى", - دەيدى بالاباقشا ديرەكتورى گۇلنازىم بەستۇباەۆا.
سونداي-اق قۇزىرلى ورگان جابىرلەنۋشىنىڭ ارىزى بويىنشا قىلمىستىق ءىس قوزعاعان
"جابىرلەنۋشىنىڭ ارىزى بويىنشا الماتى اۋداندىق پوليتسياسىمەن سوتقا دەيىنگى تەرگەپ-تەكسەرۋ امالدارى جۇرگىزىلۋدە. ناتيجەسى بويىنشا پروتسەسسۋالدىق شەشىم قابىلداناتىن بولادى", - دەدى نۇر-سۇلتان قالاسى پوليتسيا دەپارتامەنتىنىڭ ءباسپاسوز قىزمەتىنىڭ جەتەكشىسى ەلميرا شاۋلەنوۆا.
بالاباقشالارداعى بىلىق ازايار ەمەس.
“ادىرنا” ۇلتتىق پورتالى
